pb 40 rle duc d’Athenes, le conte de Flandres, conte d’Auçoirre, le conte de Sançoirre, le conte Raoul d’Eu, le connestable de France, le conte de Porsien, le conte de Roussi, le conte de Branne, le conte de Grantpré, le sire de Coucy, le sire de Craon et grant foison de noble chevalerie de Normandie et des basses marches. Quant ilz furent tous assembléz a Saint Quentin et la environ il fu regardé par le connestable, le conte de Guines et par les mareschaux de France, monseigneur Robert Bertran et monseigneur Mahieu de Trie, quel nombre de gens ilz pouoient estre si trouverent qu’ilz estoient bien VIM armeures de fer et VIIIM que brigans que autres gens poursivans l’ost. C’estoit asséz si comme ilz disoient entr’eulx pour combatre Hainau et toute sa puissance. Si se mistrent aux champs par l’ordonnance des mareschaux et partirent de Saint Quentin et s’arrouterent devers le Chastel en Cambresis et passerent de hors Bohaing et chevaucierent tant qu’ilz passerent le Chastel en Cambresis. Et s’en vindrent logier le duc de Normandie et tout son ost en la ville de Montais sus la riviere de Selles. Or vous conterons d’une grant appertise d’armes que messire Girart de Werchin, seneschal de Henau fist.

Le seneschal de Haynau dessus nomme sçot bien par ses espies que le duc de Normandie estoit logiés a Saint Quentin et que ses gens menaçoient durement le paÿs de Hainau. Avec tout ce il sçot l’eure et la venue du dit duc a Montais et estoit la arrestéz de hors la forteresce du Chastel en Cambresis. Si s’avisa en soy meismes comme preux chevalier et entreprenant qu’il yroit le duc escarmuchier et esveillier, si pria aucuns chevaliers et escuiers ce qu’il en pot trouver entour lui qu’ilz voulsissent aler ou il les menroit et ilz lui orent en couvent. Si se parti de son chastel de Werchin environ LX lances en sa compaignie tant seulement et chevaucierent depuis souleil esconsant et firent tant qu’ilz vindrent a Forés a l’issue de Haynau et a une petite lieue de Montais et pouoit estre environ jour failli. Si trestost qu’ilz furent venuz en la ville de Forés , il fist tous ses gens arrester enmy un champ. Et leur fist retraindre leurs armeures et recengler leurs chevaux et puis leur dist ce qu’il vouloit faire et ilz furent tous joieux et distrent qu’ilz s’aventuroient voulentiers avec lui et ne lui faudroient jusques au mourir. Et il leur dist grans merciz. Avec lui estoient des chevaliers mesire Jaques du Sart, messire Henry d’Usphalise, mesire Oulphart de Guistelles, mesire Jehan du Chastelet, le sire de Vertain et le sire de Waregni. Et des esciuers Giles et Thierry de Sommain, Baudouin de Biaufort, Colebiers de Bruille, Moriau de Lestines, Sandrart d’Escarmain, Jehan de Robersart, Bridoul de Thiaux et pluseurs autres. Puis chevaucierent quoiement si vindrent a Montais et se bouterent en la ville et ne faisoient les françois point de guet. Lors descendirent premierement le seneschal de Haynau et tous les compaignons devant un grant hostel ou ilz cuidoient certainement que le duc de Normandie fust mais il estoit en un autre hostel avant. Et leans estoient logiés II grans seigneurs de Normandie, le sire de Bailloel et le sire de Briance. Si furent assailliz vistement et la porte de leur hostel boutee oultre. Quant les II chevaliers se virent ainsi surpris et oirent crier : Haynau, au seneschal!, ilz furent esbahiz. Neantmoins ilz se mistrent a defence ce ce qu’ilz porent mais le sire de Bailloel fu la occiz dont ce fu dommage et le sire de Briance prisonnier au dit seneschal et ot en couvent sus sa foy de venir dedens III jours tenir prison en Valenciennes. Dont se commencierent François a estourmir et a vuidier de leurs hostelz et alumer grans feus et tortiz et a resveillier l’un l’autre meismes on resveilla le duc de Normandie et le fist on armer en grant haste et aporter sa baniere devant son hostel et desvoleper. La se traioient toutes gens d’armes de leur costé. Quant les Henuiers apparçurent les François ainsi estourmis si ne voudrent plus demourer ains se retrairent bellement et sagement devers leurs chevaux et monterent sus. Et se partirent quant ilz se pb 40 v