The Online Froissart

Edition mode Settings Browse | Collate

pb 38 rqui n’estoient que de palis, rompues et bresiees et entra en la ville tout premierement mesire Jehan de Hainau et sa baniere en grant huee et en grant fouleis de gens et de chevaux. Et adont se recueillirent en la place devant le moustier le vidame de Chaalons et aucuns chevaliers et escuiers et leverent la leur baniere et leurz pennons et moustrerent de fait bien semblant et corage de eulx combatre et tenir tant que par honneur ilz pourroient durer mais le sire de Vrevins se party et sa baniere sans arroy et sans ordonnance et n’osa demourer. Car bien sentoit mesire Jehan de Haynau si aÿré sur lui qu’il ne l’eust pris a nulle raençon. Si monta au plus tost qu’il pot sus fleur de coursier et prist les champs. Ces nouvelles vindrent a monseigneur Jehan de Haynau que son grant ennemy et qui tant avoit porté de dommage a sa terre de Chimay, estoit partiz et s’en aloit devers Vrevins. Adont le sire de Biaumont monta sur son coursier et fist chevaucier sa baniere et vuida Aubenton en entente de raconsuir son ennemy. Ses gens le suirent chascun qui mieux mieux, et les autres demourerent en la ville, le conte de Haynau et sa bataille, qui se combatirent asprement et fierement a ceulx qui s’estoient arrestéz devant le moustier. La ot dur hustin et fier et maint homme reversé et miz par terre. Et la furent tresbons chevaliers le vidame de Chaalons et ses trois filz et y firent mainte appertise d’armes. Endementiers que ceulx se combatoient, mesire Jehan de Haynau et ses gens chacierent le seigneur de Vrevins. Auquel il avint si bien qu’il trouva les portes de sa ville toutes ouvertes et entra ens en grant haste. Et jusques la le poursui sur son coursier, l’espee en la main, mesire Jehan de Haynau. Quant il vit qu’il lui estoit reschappé et entré en sa forteresce, si en fu durement courroucié et retourna arriere vistement tout le grant chemin d’Aubenton. Si encontrerent ses gens les gens du seigneur de Vrevins, qui le suioient a leur pouoir. Si en occirent et mistrent par terre grant foison et puis retournerent dedens Aubenton. Si trouverent leurs gens qui ja avoient delivré la place de leurs ennemiz et estoit pris le vidame et durement navré et mort II de ses enfants ce jour fais chevaliers et aussi pluseurs autres ne onques chevalier n’eschappa, ne escuier fors ceulz qui se sauverent avec le seigneur de Vrevins qu’ilz ne fussent tous mors et tous pris. Et bien CC hommmes de la ville et fu toute pillee et robee et les grans avoirs et prouffiz qui dedens estoient, chargiés sur chars et sur charrettes et envoiéz a Chimay. Avec tout ce la ville d’Aubenton fu toute arse et se logierent ce soir les Henuiers sus la riviere. Et a l’endemain ilz chevaucierent devers Mauberfontaines.

SHF 1-97 sync

Aprés la destruction de Aubenton, ainsi que vous avéz oy, s’acheminerent les Henuiers et leurs routes devers Mauberfontaines. Sitost qu’ilz y parvindrent, ilz le conquistrent, car il n’y avoit point de defence. Et la pillierent et roberent et puis l’ardirent. Et aprés, la ville de Aubecuel, et Segni le Grant et Segni le Petit, et tous les hamiaux et villages de la entour dont il en y ot plus de XL. Ainsi se contrevengierent a ce commencement les Henuiers des dommages que on leur avoit fais tant en la terre de Chimay comme a Haspre mais depuis les François leur firent chier comparer, si comme vous orréz avant en l’istoire. Depuis ceste chevauciee faite le conte de Hainau se trait devers la ville de Mons et donna congié a toutes manieres de gens d’armes et les remercia grandement et bellement chascun de son bon service et fist tant que tous se partirent bien contens de lui, si s’en rala chascun en son lieu. Asséz tost aprés, vint il en voulenté et en propos au dit conte que d’aler esbatre en Engleterre et faire certaines aliances au roy son serourge pour estre plus fort en sa guerre. Car bien pensoit et disoit que la chose ne pouoit demourer ainsi que le roy son oncle ne feist aucuns armee contre lui et pour estre plus fort bon lui sembloit et a son conseil aussi qu’il eust l’amour et l’aliance des Englois, des Flamens et des Brebançons. Si manda le dit conte tout son conseil a Mons en Hainau et leur remoustra son entente et ordonna et institua la monseigneur Jehan de Haynau son oncle a estre pb 38 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.