The Online Froissart

Edition mode Settings Browse | Collate

pb 14 rilz estoient si afoibliz, si fonduz et si afaméz que a paines pouoient ilz avant aler. L’endemain ilz se deslogierent et chevaucierent encore plus avant et s’en vindrent logier de haute heure deléz une grande abbaie a deux lieues pres de la cité de Duremmes, si se loga le roy la nuit en celle court et l’ost contreval les prés. Si trouverent asséz a fourer qui leur vint bien a point, herbes, vesces et bles. L’endemain se reposa l’ost la endroit tout quoy et le roy et les seigneurs alerent vers l’eglise de Duremmes et adont fist le roy feauté a l’eglise et a l’eveque de Duremmes et aussi aux bourgois car faite ne l’avoit encore. En celle cité trouverent ilz leurs charrettes et leurs charretiers et tous leurs harnois qu’ilz avoient laissiés XXXV jours en avant en I boys a mienuit, si comme il est contenu par dessus. Et les avoient les bourgois de la cité de Duremmes qui trouvéz les avoient ou boys, amenéz dedens leur ville a leur coust et fait mettre en vuides granches chascune charrette atout son panoncel pour recongnoistre, si furent tous liés les seigneurs quant ilz orent trouvéz leurs charrettes et leurs harnois, et reposerent II jours en la cité de Durem et l’ost tout entour car bien ne se peust tout logier en la dicte cité et firent leurs chevaux referrer et puis se mistrent en voie devers Ebruich. Si exploita tant le roy et tout son ost que dedens III jours ilz y vindrent. Et la trouva le roy madame sa mere, qui le reçut a grant joie et aussi firent toutes les dames et les bourgois de la ville. La donna le roy congié a toutes manieres de gens de raler chascun en son lieu et remercia grandement les contes, les barons et les chevaliers du service qu’ilz lui avoient fait. Et retint encore deléz lui monseigneur Jehan de Hainau et toute sa route, qui furent grandement festoiéz de madame la royne et de toutes les dames. Et relivrerent les Hainuiers leurs chevaux, qui tous estoient afonduz et afoléz, au conseil du roy, et fist chascun somme pour lui de ses chevaux mors et vifs et de ses frais, si en fist le roy sa debte envers le dit monseigneur Jehan de Hainau. Et le dit mesire Jehan s’en obliga envers tous les compaignons car le roy et ses consauls ne porent sitost recouvrer de tant d’argent que les chevaulx montoient. Mais on leur en delivra asséz par raison pour paier leurs menuz frais et pour retourner au paÿs. Et puis furent ilz tous paiéz dedens l’annee de ce que les chevaux montoient. Quant les Henuiers orent relivré leurs chevaux, ilz racheterent chascun des petites haguenees pour chevaucier mieux a leur aise et renvoierent leurs garçons et leurs harnois, sommes malles et bahuz par mer et mistrent tout en II nefs que le roy leur fist delivrer. Si arriverent ces besoingnes droit a l’Escluse en Flandres. Et ilz pristrent congié au roy et a madame sa mere, au conte de Kent, au conte Henry de Lencastre et aux barons, qui grandement les honnorerent. Et les fist le roy acompaignier de XII chevaliers et CC armeures de fer pour la doubtance des archiers dont ilz n’estoient mie bien asseuréz, car il les couvenoit repasser parmy leur paÿs, l’eveschié de Lincolle. Si se partirent mesire Jehan de Henau et toute sa route ou conduit dessus dit et chevaucierent tant par leurs journees qu’ilz vindrent a Douvres. La monterent ilz en mer, en nefs et en vaisseaux qu’ilz trouverent appareilliés, et les Englois se partirent d’eulx qui aconvoiéz les avoient, et retournerent chascun en son lieu. Et les Heinuiers se reposerent a Wisant. La sejournerent ilz par II jours en mettant hors leurs chevaus et le demourant de leur harnois. Endementiers vindrent mesire Jehan de Henaut et aucuns chevaliers en pelerinage a Nostre Dame de Bouloingne. Puis s’en retournerent ilz en Hainaut et se departirent tous l’un de l’autre, et se retrait chascun chiés soy, mais mesire Jehan s’en vint devers le conte son frere, qui se tenoit a Valenciennes, lequel le reçut liement et voulentiers car moult l’amoit, et dont lui recorda le sire de Biaumont toutes les nouvelles si avant qu’il les savoit.

SHF 1-38 sync Le mariage du roy Edouart d’Engleterre a la fille du conte de Henaut.

Ainsi fu celle grande et dure chevauciee departie que le roy Edouart, le premier an de sa creation, fist contre les Escos. Ne demora mie granment de temps aprés que ce roy, madame sa mere, le conte de Kent son oncle, le conte Henry de Lencastre, messire Rogier de Mortemer et les autres barons d’Engleterre qui estoient demouréz du conseil du roy pour lui aidier a conseillier et gouverner, orent conseil et advis de lui marier. Sy envoierent un evesque, II chevaliers baneréz pb 14 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.