pb 7 ret y fy logie et herbegie bien et aisiement et le vint la veoir la contesse de Hainau, qui li fist toute honneur et reverense, car bien le savoit faire. Et ossi fist li contes Guillaumes de Haynau mais il estoit maladieus de goutes, se ne chevauçoit mie a son aise. Toutesfois il honnoura et festia la dame et son fil mout grandement le terme que elle sejourna a Valenchiennes environ III semaines entroés elle fist apparillier son oiree et ses besongnes. Et li dis messires de Biaumont fist escripre lettres moult affectueusement as chevaliers et as compagnons de cui il se fioit le plus en Haynau, en Braibant et en Hasebaing et les prioit si a certes qu’il pooit et cascun sur toutez amistiés qu’il venissent avoec lui en ceste entrepresure. Si en y eut grant plenté de l’un païs et de l’autre, qui y aloient pour l’amour de lui et grant plenté qui n’i alerent mie comment qu’il en fussent priiet. Et meismement li dis messires Jehans en fu durement repris de son frere et d’aucuns de son propre conseil, pour tant qu’il leur sambloit que li entrepresure estoit si haute et si perilleuse, selonc les descors et les grandes haines qui estoient adont entre les haus barons et les communs d’Engleterre et selonc che que li Englés sont communement envieus sur toutes estrengnes gens quant il sont a leur deseure et meismement en leur païs que cascuns avoit paour et doubtante que li dis messires Jehans ne nuls de ses compagnons peuist jamais revenir. Mes quoyque on li blamast ne desconsillast, le gentils chevaliers ne s’en vault onques delaiier. Ains dist que il n’avoit que une mort a souffrir, qui estoit en le volenté Nostre Signeur. Mes il avoit prommis a celle gentils dame de li conduire jusques a son royalme. Si ne l’en faurroit pour morir. Et ossi chier avoit il a prendre le mort avoec celle noble dame, qui estoit ensi decachie, se morir y devoit que aultre part. Car tout chevalier doivent aidier a leur loial pooir toutes dames et pucelles decachies et desconfortees a leur besoing et especialment quant il en sont requis.
SHF 1B-11 syncEnsi se parti la roine d’Engleterre de le ville de Valenchiennez, quant elle et ses gens furent apparilliet de che qu’il leur falloit et prist congiet au gentil conte Guillaume de Haynau et madame Jehane, la contesse, sa femme, et les remerchia humilement et doucement de le bonne lie chiere et de la belle requelloice que il li avoient faite. Si se mist a voie sus le seureté et conduit del gentil chevalier, le dit monsigneur de Biaumont. Si fisent tant par leurs journees que il vinrent a Dourdret en Hollandes. La endroit se pourveirent de naves et de vaissiaus, grans et petis, ensi qu’il les peurent trouver et misent dedens leurs chevaus, lors harnas et leurs pourveanches. Et quant il orent veü par avis boin pour eulz, il se commanderent pb 7 v