pb 59 vau roy englés, qui se tenoit a Gand, dalés la roine sa femme, et entendoit a ordonner ses besongnes. Quant li termes deubt approchier que li signeur dessus nommet se devoient trouver devant Tournay, et que li blet commenchoient a meurir, li rois englés se party de Gand a moult belle gent d’armes de son païs, VII contes, II prelas et XXVIII banerés et bien CC chevaliers. Et estoient Englés IIIIM hommes d’armes et IX mille archiers, sans le pietaille. Si s’en vint et passa et toute sen ost parmi le ville de Audenarde; et puis passa le riviere d’Escaut, et s’en vint logier devant Tournay, a le Porte de Saint Martin, ou chemin de Lille et de Douay. Assés tost apriés, vint ses cousins li dus de Braibant, a plus de XX mille hommes, chevaliers et escuiers, et les communautés de ses bonnes villes. Et se loga li dis dus devant Tournay; et comprendoit sen ost grant quantité de terre. Et estoient Braibenchon logiet au Pont a Riés, contreval l’Escaut, mouvant de l’abeye Saint Nicolay, revenans vers l’Empire et le Porte de Valenchiennes. Aprés li contes de Haynau estoit avoecques belle chevalerie de son paÿs; et avoit grant fuison de Hollandois et de Zellandois, qui le gardoient de priés, et le servoient ensi que leur signeur. Et estoit li contes de Haynau logiés entre le duc de Braibant et le roy d’Engletere. Aprés estoit Jaques d’Artevelle a plus de LX mille Flamens sans chiaus d’Ippre et de Popringhe et de Cassiel et de le castelerie de Berghes, qui estoient envoiiet d’autre part, enssi que vous orréz chi apriés. Et estoit Jaquemes d’Artevelle logiés a le Porte Sainte Fontaine, d’une part de l’Escaut. Et d’autre part avoient li Flamenc fait I pont de nefs sus l’Escaut pour aller et venir a leur aise. Li dus de Guerlles, li contes de Jullers, li marquis de Blanquebourc, li markis de Misse et Deurient, li contes des Mons, li contes de Saumez, li contes de Fauquemont, messires Ernouls de Baquehen et tout li Allemant estoient logiet d’autre part devers Haynnau. Et avoient fait ossi I pont sus l’Escaut au dessus de Tournay et pooient aller et chevauchier de l’une ost a l’autre. Ensi estoit la chités de Tournay assise et environnee de tous lés et de tous costés, ne nuls n’en pooit partir, entrer ne aller, que che ne fust par congiet, et qu’il ne fust veüs et appercheus de chiaus de l’ost, sus le quel costet que che fust.

Chis sieges fais et arrestés devant le chité de Tournay, si com vous avés oy, dura longuement. Et estoit li hos de chiaus de dehors bien pourveue et avitaillie de tous vivres, et a bon marchiet, car il lor venoit de tous lés, par tere et par yauwe. Si y eut, le siege durant, la environ pluiseurs belles apertises d’armes faites et pluiseurs chevauchies, des quelles nous ferons en sievant mention. Car li jones contes de Haynau qui estoit hardis et entreprendans, avoit si pris en pb 60 r