pb 50 rfist la li rois englés pluiseurs nouviauls chevaliers, entre les quels il fist monsigneur Jehan Camdos, qui depuis de proeche et de chevalerie fu plus recommandés que nuls chevaliers de son tamps, si com vous orés avant en ceste ystore. Si avoit li rois XXVIII banieres et environ IIIIXX et X pengnons. Et pooient estre en se bataille environ VI M hommes d’armes et VI M archiers. Et avoient mis une aultre bataille sus elle, dont li contes de Warvich et li contes de Pennebruch, li sires de Bercler, li sires de Mulleton et pluseur aultre bon chevalier estoient chief. Si se tenoient chil a cheval pour conforter les batailles qui branleroient et estoient en celle arriere garde environ trois mille armeures de fier.
SHF 1-87 syncQuant tout li Englés, li Alemant, li Braibenchon et tout li alloiiet furent ordonnet, ensi que vous avés oy, et cascuns sires mis et arrestés desous sa baniere, ensi que commandé fu depar les marescaus, si fu dit encores et commandé depar le roy que nuls n’alast ne se mesist devant les banieres des mareschaus. Adont monta li rois englés sus I petit palefroy moult bien amblant, acompaigniés tant seulement de monsigneur Robert d’Artois, de monsigneur Regnaut de Gobehen et de monsigneur Gautier de Mauni. Et chevauça devant toutes les bataillez et prioit moult doucement as signeurs et as compaignons que il vausissent aidier a garder son honneur et cascuns li avoit en convent. Aprés che, il s’en revint en se bataille. Et se mist en ordenance enssi qu’il appertenoit. Or vous recorderons l’ordenance dou roy de France et de ses batailles, qui furent grandes et bien estoffees. Et vous en parlerons bien otant que nous avons fait de ceste des Englés. Il est bien verités que li rois de France avoit si grant peuple, et tant de nobles et de bonne chevalerie que mervelles seroit a recorder. Car ensi que je oÿ dire chiaus qui y furent et qui les aviserent tous armés et ordonnés sus les camps, il y ot XIXX et VII banieres, VC et LX pengnons, IIII rois et VI dus et XXXVI contes et plus de IIII M chevaliers, et de communes de France plus de LX M. Li roy avoecques le roy de Franche estoient li rois de Behaigne, li rois de Navare et li rois d’Escoce, li dus de Normendie, li dus de Bourgongne, li dus de Bretaigne, li dus de Bourbon, li dus de Lorraine, li dus d’Ataines; des contes, li contes d’Alenchon, freres au roy de France, li contes de Flandrez, li contes de Haynau, li contes de Blois, li contes de Bar, li contes de Foriés, li contes de Fois, li contes d’Ermignach, le daufin d’Auvergne, li contes de Genville, li contes d’Estampes, li contes de Vendome, li contes de Halepb 50 v