pb 35 rle roy englés, quand il li plairoit, et que cascuns le serviroit a I certain nombre de gens d’armes a hiaumes couronnéz. En ce tamps parloit on de hiaumez et ne faisoient li signeur nul compte d’autre gens d’armes, s’il n’estoient a hiaumez et a timbres couronnéz. Or est chis estas muéz maintenant; on parolle de lancez ou de glaves et de jaques. Et vous di que chil signeur dessus nommet orent en convent as gens le roy d’Engleterre que il leur aideroient a aultres signeurs d’outre le Rin qui bien avoient pooir de amener grant fuison de gens d’armez, mes qu’il euissent souffissanment le pourquoy. Puis prisent congiet li dessus dit signeur allemant et en ralerent en leur paÿs. Et li signeur d’Engleterre demorerent encore a Valenciennes et en Haynau dalés le conte, par quel conseil il envoierent le plus. Si priierent et envoierent encore souffissans messages devers l’ evesque de Liege, monsigneur Arnoulz, et l’euissent volentiers atrait de leur partie; mes li dis evesques n’i volt onques entendre ne riens faire encontre le roy de France a qui il estoit devenus homs et entrés en sa feaulté. Li rois Charles de Behaigne ne fu point priiés ne mandéz, car on savoit bien qu’il estoit si conjoins au roy de France par le mariage de leurs II enfans, dou duc Jehan de Normendie, qu’il avoit a feme madame Bonne, fille au dessus dit roy, que pour celle cause il ne feroit riens contre le roy de France. Or me tairay I petit d’iauls et parleray d’une aultre matere qui a ceste se rajoindera.
SHF 1-59 sync Coment Jaques d’Artevelle gouverna le conté de Flandre.En che tamps dont jou ay parlet, avoit grant dissention contre le conte Loeys de Flandrez et les Flamens. Car il ne voloient point obeir a lui ne a paines s’osoit il tenir en Flandres fors en grant peril. Et avoit a che dont I homme a Gand qui avoit esté brasserez de miels. Chis estoit entréz en si grant fortune et en si grant grasce a tous les Flamens que c’estoit tout fait et bien fait quanquez il voloit deviser et commander par toute Flandres de l’un des corons jusques a l’autre. Et n’i avoit nullui, con grans qu’il fust, qui de riens osast trespasser ses commandemenz ne contredire. Il avoit toudis apriés lui alant aval le ville de Gand LX ou IIIIXX varlés armés entre les quelz il en y avoit II ou III qui savoient aucuns de ses secréz. Et quant il encontroit I homme qu’il haioit ou qu’il avoit en soupechon, chilz estoit tantos tués. Car il avoit commandé a ces secrés varléz et dit : "Sitost que jou encontre I homme et je vous fay I tel signe, si le tués sans deport, con grans ne con hauls qu’il soit, sans atendre aultre parolle." Ensi avenoit souvent et en fist en celle maniere pluiseurs grans mestres tuer, par quoy il estoit ensi doubtés que nuls n’osoit parler contre cose qu’il vosist faire ne a paines penser de lui contredire. Et tantost que cil LX varlet le avoient raconduit a son ostel, cascuns aloit disner a se maipb 35 v