pb 25 ret toutes gens assés pour li garder et servir et faire compaignie, et chevaliers et escuiers d’onneur, ensi comme a si haulte dame que elle estoit appartenoit. Et li assigna et delivra grant terre et belle revenue, pour li souffissanment gouvrener, selonc son noble estat, tout le cours de se vie. Et la ditte revenue au plus priés de celli castiel qu’il peut par raison. Mes il ne volt mies souffirir ne consentir que elle alast hors, ne se moustrast nulle part, fors en aucuns esbas qui estoient devant le porte dou castiel, et qui respondoient a le maison. Si usa la ditte dame la sa vie depuis assés bellement. Et le venoit veoir, II ou III fois l’an, li jones rois Edouars, ses fils. Or nous soufferons a parler de la ditte dame et parlerons dou dit roy son fil et comment il persevera en signourie.
SHF 1-44 sync De l’omage que le jeune roy Edouart fit au roy de France de la duché de Guienne.Apriés che que chis rois Edouwars, qui estoit en son jone eage, ot fait faire ces deus grandes justices, si com vous avés oy chi dessus conter, il prist nouvel conseil des plus sages et des mieuls creüs de son royaume et se gouvrena moult bellement et maintint son royaume en pais par le bon conseil qu’il avoit dallés lui. Or avint que, environ I an apriés que li rois Phelippes de Vallois ot esté couronné a roy de France, et que tout li baron et li tenant dou dit royaume li orent fait feaulté et hommage, excepté li jones rois Edouars d’Engleterre, qui encore n’estoit trais avant, et ossi il n’avoit point esté mandés; se fu li rois de France consilliés et enfourmés que il mandast le dit roy d’Engleterre et venist faire hommage et feaulté, ensi comme il apertenoit. Adont en furent priiet d’aler en Engletere faire ce message et sommer le roy li sires d’Aubegni et li sires de Biausaut et doy clerc, mestre en drois en Parlement a Paris, que on appelloit pour ce tamps maistre Symons d’Orliiens et maistres Pieres de Maisieres. Cil IIII au commandement et ordonnance dou roy se partirent de Paris bien estoffeement. Et cheminerent tant par leurs journees qu’il vinrent a Wissant. La monterent il en mer, et furent tantost oultre et arriverent a Douvrez et sejournerent la I jour pour attendre leurs chevaus et leur harnas que on mist hors des vaissiaus. Quant il furent tout prest, il monterent sus, et esploitierent tant par leurs journees qu’il vinrent a Widesore, ou li rois d’Engleterre et la jovene roine, sa femme, se tenoient. Li IIII dessus nommet fisent assavoir au roy pourcoy il estoient la venu et ossi de qui il se rendoient. Li rois d’Engleterre, pour l’onneur dou roy de France, son cousin, les fist venir avant et les rechut moult honnerablement; et ossi fist madame la roine sa femme, ensi que bien le savoient faire. En apriés, il compterent leur message; il furent volentiers oy, et en respondi adont li rois qu’il n’avoit mie son conseil dalés lui, mes il le manderoit; si se retraisent en le chité de Londres, et la il en seroient respondu telement que bien deveroit souffire. Sus ceste parolle, quant il orent disné en la cambre dou dit roy et de la royne moult aise, il s’en pb 25 v