pb 24 rbataille s’en ala droit as tentes le roy de Behaigne. Et l’eurent prés trouvé en tel point. Et la tierche bataille s’en ala droitement as tentes le conte de Hainnau, et l’eurent priés aussi souspris, et le hasterent si que a grant paine peurent ses gens estre armet, ne les gens monsigneur de Biaumont, son frere. Et vinrent toutes ces III bataillez si paisiblement jusques a tentes, que a grant meschief furent li signeur armet, ne leurs gens assamblés. Et euissent tout li signeur et leurs gens esté mors, se Dieus ne les euist, ensi que par droit miracle, secourut et aidiet. Mes, par le grasce et le volenté de Dieu, cascuns de ces signeurs desconfi se bataille si entierement, et tous a une heure et en point, que onques de tous ces XVI mille Flamens n’en escapa que mil, et fu leur capitaine mors. Et si ne sceut onques nuls de ces signeurs nouvelles li uns de l’autre, jusques a dont qu’il eurent tout fait. Et onques des XV mille Flamens qui mors y demorerent, n’en recula uns seuls, que tout n’i fusent mort et tuet en III monchiaus l’un sus l’autre, sans issir de le place la ou cascunne bataille commencha, qui fu l’an de Grasce M CCC XXVIII, le jour saint Bietremieu. Adont aprés ceste desconfiture vinrent li François a Cassel et y misent les banieres de France. Et se rendi le ville au roy, et puis Popringhe, et puis Yppre. Et tout chil de le castelerie de Berghes, et cil de Bruges ensievant. Et rechurent le conte Loÿs, leur signeur, adont amiablement et pasiblement et li jurerent foy et loiaulté a tenir a tousjours mes.
Quant li rois Phelippes de France ot remis le conte de Flandres en son paÿs, et que tout li eurent juret fiableté et hommage, il departi ses gens et retourna cascuns en son lieu; et il meismes s’en vint en France et sejourner a Paris ou la environ. Si fu durement prisiés et honnerés de celle emprise qu’il avoit faite sus les Flamens, et dou service aussi au conte Loeis, son cousin. Si demora en grant prosperité et en grant honneur. Et acrut grandement l’estat royal. Et n’i avoit onques mais eut en France, si com on disoit, roy qui euist tenu l’estat parel au roy Phelippre. Et faisoit faire tournois, joustes, festes et esbatemens moult souvent et a grant plenté. Coment le conte de Cain et mesire Roger de Mortemer furent justiciéz. Or nous tairons nous I petit de lui, et parlerons d’aucunes des ordenances d’Engleterre et dou gouvrenement le roy. SHF 1-43 sync Li jones rois englés sejourna un grant tamps, si com vous avés oy chi dessus recorder, par le conseil de madame se mere, dou conte Aiumon de Kent, son oncle, et de monsigneur Rogier, signeur de Mortemer. Au darrain, envie commencha a naistre entre le conte de Kent dessus dit et le signeur de Mortemer. Et monta puis li envie si haut que li sires de Mortemer enforma et enhorta tant le jone roy par le consentement de madame se mere le royne. Et li fisent entendant que li dis contes de Kent le voloit enpuisonner et le feroit morir temprement, se il ne s’en gardoit, pour avoir son royalme, comme li pb 24 v