pb 14 rmis les signeurs qui aloient veoir le roy et la royne et leur conseil pour festiier et pour aprendre des nouvelles, ne con longement on les tenroit en cel estat ne en celle angoisse. Et se li meschiés de le mesaventure et li perils ne fust, il sejournoient assés aisiement. Car li cités et li païs d’entour yaus estoit si plentiveus que dedens plus de VI sepmainnes que li rois et tout li signeur d’Engleterre et li estrengnier et leurs gens, dont il y avoit plus de LX mille hommez, sejournerent la, onques ne renchierirent li vivre, que on n’en eust le denree pour I denier, ossi bien que on avoit en avant qu’il y venissent, bons vins de Gascongne, d’Aussay et de Rin, a tres bon marchiet, poullaille et toutes manieres d’autres vivres ensi. Et leur amenoit on devant leurs hostels le fains, l’avainne et le litiere, dont il estoient bien servi, et a bon marchiet.
SHF 1-27 syncQuant il eurent la sejourné
par l’espasse de III sepmainnez aprés le bataille, on leur fist assavoir depar le
roy et les mareschaus que cascuns se pourveist dedens celle aultre
sepmainne de carettes et de keutes pour gesir as camps et de tous aultres necessaires ostieuls
pour aler oultre pardevers Escoce, car li rois ne voloit la plus
sejourner. Adont se pourvey cascuns au mieulx qu’il pot selonc son estat. Quant
on fu apparilliet, li rois et tout li baron se traisent hors et alerent logier VI lieuez ensus de le ditte chité et messires Jehans de Hainnau et
se compagnie furent logiet toudis au plus prés dou roy pour honneur et par tant
aussi que on ne voloit mies que li archier, qui tant les haoient, euissent nul avantage sus yauls.
Si sejournerent li rois et ces premieres routes II jours
pour attendre les darrains et pour mieuls aviser cascun, se il li falloit riens. Au tierch jour aprés, toute li host qui fu la se desloga et se traisent avant de jour en jour, tant
que on vint oultre le cité de Durem une grande journee a l’entree d’un païs que
on appelle Norchombrelande, qui est sauvages païs, plains de desiers et de grandes
montengnes et drument povres païs de toutes coses fors que de bestes. Si keurt parmi une
riviere, plainne de cailliaus et de grosses pieres, que on nomme Thin. Sus celle riviere siet d’amont li ville et li castiauls que on claime
Carduel en Galles, qui fu jadis au roy Artus, et ou il se tenoit moult volentiers.
Et d’aval le ditte riviere siet la bonne ville que on claime le Noefcastiel sur
Thin. La estoit li mareschaus d’Engleterre, atout grant gent d’armes, pour
gardesr le païs contre
les Escos, qui gisoient as camps pour entrer en Engleterre.
Et a Cardoel gisoient aussi grant fuison de Gallois, dont
li contes de Herfort et li sires de Monbray estoient conduiseur et
gouvreneur, pour deffendre le passage de le riviere. Car li Escot pb 14 v