pb 10 rde cuer et traitres et que par son traitre conseil et enort li rois avoit honni son roiaume et mis a meschief et avoit fait decoller les plus grans signeurs et barons d’Engleterre, par les quels li royalmes devoit estre soustenus et deffendus. Et avoec che il l’avoit si enhorté le roy qu’il ne pooit ou ne voloit veoir la roine sa femme, ne son ainnet fil, qui devoit estre lors sires; ains les avoit decachiés par doubtance de leurs corpz hors dou roiaume. Aprés, quant li dis messires Hues fu ensi atournés, comme dit est, on li coppa le teste et fu envoie en le chité de Londres; et puis fu il decopés en IIII quartiers. Et furent tantost envoiiet as IIII milleurs chités d’Engleterre apriés Londres.
SHF 1-19 sync Aprés ceste justice fecte la roine et tous les seigneurs se mirent en chemin vers Londres.Aprés ceste justice faite, si com vous avés oy, la roine et tout li signeur et grant fuison dou commun dou païs, se misent au chemin vers Londres, et fisent tant par leurs petites journees qu’il y parvinrent a grant compagnie. Et issirent communement tout cil de Londrez, grans et petis, encontre la roine et son ainsnet fil, qui devoit estre lors drois sires, et lor fisent grant feste et grant reverense, et a toute lor compagnie ossi. Et donnerent chil de Londres grans dons a le ditte roine et a chiaus la ou il leur sambloit mieulx emploiiet. Quant il furent ensi recheut et si grandement festiiet, si que dit est, et il eurent la sejourné environ XV jours, li compagnon qui passet estoient avoecq monsigneur Jehan de Haynau, eurent grant talent de retourner cascuns en se contree. Car il leur sambloit qu’il avoient bien fait la besongne et acquis grant honneur, ensi qu’il avoient. Si prisent congiet a madame la roine et as signeurs dou païs. Madame la roine et li signeur leur priierent assés de demorer encores I petit de tamps pour veoir que on vorroit faire dou roy, qui en prison estoit, ensi que oy avés; mais il avoient si grant desir de retourner cascuns en sa maison que priiere n’i valu riens. Quant la royne et ses consaulz veirent chou, il priierent de costé a monsigneur Jehan de Haynau qu’il vosist encore demorer jusques apriés le Noel, et qu’il detenist de ses compagnons avoecques lui chiaus qu’il en poroit detenir. Li gentils chevaliers ne volt mies laissier a parfaire son serviche, et otria courtoisement le demorer jusques a la volenté de madame la roine. Si detint de ses compagnons che qu’il en peut detenir, mais petit fu. Car li aultre ne vorent nullement demorer pour nulle priiere. Il leur fisent toute l’onneur et le reverense qu’il peurent. Et leur fist la roine donner grant argent pour leurs frais et pour leurs services, et grans joiaulz, et cascun selonch son estat, si grandement que tout se tinrent a bien content. Et avoecq che elle leur fist rendre le estimation de lors pb 10 v