pb 6 vd’armes de France par la bonne voulenté et conseil de son frere pour aler puissamment et emmener son filz en son royaulme, si comme ses amys d’Angleterre luy avoyent mandé, et comment son frere fut tellement conseilléz depuis, comme vous avéz ouy, et lui compta comment ne a quel meschief elle estoit la affouye atout son filz, comme celle qui ne savoit a qui ne a quel paÿs trouver confort ne soustenance.
SHF 1A-9 sync Comment messire Jehan de Haynault promist a la royne d’Angleterre et a son filz qu’il ne lui fauldroit jusques au mourir.Et quant le chevallier messire Jehan de Haynault out ouy la royne complaindre si tendrement que toute fondoit en larmes et en plours, si out grant pitié et commença a larmoyer, et dist ainsi a la dame: "Certes, dame, veéz cy vostre chevalier, qui ne vous fauldroit pour mourir, se tout le monde vous failloit. Ains feray tout mon pouoir de vous et de monseigneur vostre filz conduire et de vous et luy remettre en vostre estat en Angleterre a l’ayde de voz amys qui dela la mer sont, ainsi que vous dites, et je et tous ceulx que je pourray prier, y mettrons les vies et aurons gens d’armes asséz, s’il plaist a Dieu, sans le dongier du roy de France." Et quant la dame l’ot ainsi ouy parler une si haulte parolle et si reconfortant ses besoingnes, elle, qui se seoit et messire Jehan devant lui, se dreça en estant et se voulst agenouillier de la grant joye et de la grace qu’il luy offrit. Mais le gentilz sire de Beaumont ne l’eust jamaiz souffert. Ains se leva moult appertement, et prist la noble dame entre ses bras et dist: "Ne plaise ja a Dieu que la royne d’Angleterre face ce, ne ait empensee de fayre, mais dame, confortéz vous et vostre gentil filz aussi. Car je vous tendray vostre promesse. Vous vendrés veoir monseigneur mon frere et madame la contesse de Haynault et leurs beaulx enffans, qui vous recevront a grant joye. Car je leur en ay ja ouy parler." Et la ottroya et dist: "Sire, je treuve plus de confort et d’amour en vous que en tout le monde. Et de ce que vous me dittes et offréz, cinq cens mil mercys, se vous me voléz faire ce que vous me promettéz par vostre courtoysie, je demourray vostre serve et mon filz vostre serf a tousjours et mettrons tout le royaulme d’Angleterre a vostre abandon et a bon droit." Lors respondi le gentilz chevalier messire Jehan de Haynault, qui estoit en la fleur de son aage: "Certes, ma treschiere dame, se je ne le vouloye fayre, je ne le vous promettroye mye mais je le vous ay promis, si ne vous en fauldray pour riens qui en puist avenir, mieulx ameroye a mourir."
¶ Aprés ce parlement quant ainsi fut accordé, messire Jehan de Haynault prist congié pour ce soir a la royne et a son filz et aux autres seigneurs d’Angleterre qui la estoyent, et s’en revint a Davaing. La se heberga il en l’abbaye ceste nuit. SHF 1A-10 sync Et l’andemain aprés messe il monta a cheval et s’en revint devers la royne, qui a grant joye le receut et ja avoit desiré et estoit toute appareillee de monter quant messire Jehan de Haynault vint.
Comment la royne d’Angleterre se party de Buignicourt et comment elle fut honourablement receue du conte et de la contesse de Haynault.Lors se party la royne d’Anglepb 7 r