pb 34 rplusieurs
bachelers qui avoient chascun un oeil couvert de drap par quoy il n’en peust veoir. Et disoit on que ceulx avoyent voué entre dames que jamais ne verroyent
que d’un oeil tant qu’ilz eussent faitte aucune prouesce d’armes de leurs corps ou royaulme de France. Laquelle chose ilz ne vouloyent pas congnoistre a ce ceulx qui leur en demandoyent, dont chascun avoit grant
merveille.
¶ Quant ilz furent asséz festiéz et honnouréz a Vallenciennes du conte de Haynault et de messire Jehan, son frere, des chevalliers et bourgoys du paÿs et des dames aussi de Vallenciennes, le dit evesque et la plus grant partie d’eulz se trairent pardevers le duc de Braibant par le conseil du conte. Si les festia le duc moult bien car bien le sçavoit faire. Et puis s’accorderent si bellement au duc que il out en couvent de soustenir le roy angloys, son cousin, et toutes ses gens en son païs. Car s’estoit son cousin germain, si pouoit venir et aler arméz et desarméz toute ffoiz qu’il lui playroit. Et avecques ce il leur out en couvent parmy une certainne somme d’argent, se le roy angloys vouloit entrer a force en France et deffier le roy, puis qu’il peust avoir l’accord et l’aide de ces seigneurs d’Allemaigne dessus diz, il le deffieroit aussi et yroit avecques lui atout mil armeures de fer. Ainsi leur out en couvenant par son creance, de quoy il chancela et detria puis asséz, si comme vous orréz ça avant en l’istoire.
SHF 1-58 syncAdoncques furent ces seigneurs d’Angleterre moult ayse, car bien leur sembla que grandement ilz avoyent besoingné tant comme au duc, si retournerent a Vallenciennes et firent par leurs messaiges, par leur or et par leur argent tant que le duc de Guerles, serourge au dit roy angloys, le marquis de Juilliers, pour lui et pour l’arcevesque de Coulongne Walerant, son frere, et le sire de Fauquemont vindrent a a Vallenciennes parler a eulx pardevant le conte de Haynault et monseigneur Jehan, son frere. Et exploittierent si bien devers eulx parmy grandes sommes de florins que chascun devoit avoir pour lui et pour ses gens, qu’ilz ourent en couvent de deffier le roy de France avecques le roy angloys. Et que chascun le serviroit a certain nombre de gens d’armes a heaumes couronnéz. En ce temps parloit on de heaumes et ne faisoit on compte d’aultres gens d’armes s’ilz n’estoyent a heaumes et a tymbres couronnéz.
¶ Or est cel estat venu maintenant que on parle de lances, de glaives ou de jaques et vous dy que ces seigneurs dessus nomméz ourent en couvent aux gens du roy d’Angleterre qu’ilz se a erderoyent a aultres seigneurs d’oultre le Rin, qui bien avoient pouoir d’avoir maintes gens d’armes, mais qu’ilz eussent le pourquoy. Puis pristrent congié les dessus diz seigneurs allemans et s’en rala chascun en son hostel et les seigneurs d’Angleterre demourerent encores a Vallenciennes deléz le conte, par quel conseil ilz ouvroyent le plus. Si envoyerent encores souffisans messaiges pardevers l’evesque du Liege, mais il n’y voulst oncques entendre ne riens faire encontre le roy de France, a qui il estoit devenu homme et entréz en sa feaulté.
¶ Le roy Charles de Behaigne ne fut point prié ne mandé. Car on sçavoit pb 34 v