Pour tous nobles cuers encouragier et eulx monstrer exemple et matiere d’onneur, je Jehan Froissart commence a parler aprés la relacion faitte par monseigneur Jehan le Bel, chanoine de Saint Lambert de Liege, et dis ainsi que plusieurs gens nobles et innobles ont parlé par maintes foiz des guerres de France et d’Angleterre, qui pas justement ne savoyent ou sauroyent adire se requis et examinéz en estoyent, comment ne pourquoy, ne par quelles raysons elles vindrent. Mais veéz en cy la droitte fondacion et vraye de la matiere. Et pour ce je n’y vueil mettre ne oster ou oublier ne corrompre ne abregier l’istoire en riens, par deffaulte de langaige, mais la vueil multiplier et accroistre ce que je pourray, vous vueil de point en point parler et monstrer toutes les adventures depuis la nativité du roy Edouart d’Angleterre, qui si puissantment a reigné et tant y sont venues d’aventures notables et perilleuses et tant de batailles adreciees et d’autres faiz d’armes et de grans prouesces puis l’an de Grace mil CCC XXVI que ce gentilz roy fut couronnéz en Angleterre, que il et tous ceulx qui ont esté avecques luy en ses batailles et eureuses aventures ou avecques ses gens, ou il n’a mye esté en propre personne, si comme vous pourrés ouyr cy aprés, doivent bien estre tenuz et repputéz pour preux, combien que il en y a grant foyson de ceulx qui doivent et pueent bien estre tenuz pour souverains preux entre les autres, si comme le propre corps du gentil roy dessus dit, le prince de Galles, son filz, le duc de Lancastre, messire Regnault de Cobain, messire Gaultier de Manny en Haynault, messire Jehan Chandos, messire Franque de Halle, et plusieurs autres qui se ramentevront pour le bien et la prouesce de eulx dedens ce livre, car par toutes les batailles ou ilz ont esté, ilz ont eue renommee des mieulx faysans, par terre et par mer, et s’i sont monstrés sy vaillantment que on les doit bien tenir pour souverains preux, mais pour ce ne doivent mye les autres qui avecques eulz furent pis valoir.
¶ Aussi en France a esté trouvee bonne chevallerie, royde, forte et apperte et grant foyson. Car le royaulme de France ne fut oncques si desconfis que on n’y trouvast tousjours bien a qui combatre et fut le noble roy Phelippe de Valloys un treshardy et chevallereux chevallier. Et le roy Jehan, son filz, Charles, roy de Behaigne, le conte d’Alençon, le conte de Foyx, messire Saintré, messire Ernoul d’Audrehen, messire Boucicaut, messire Guichart d’Angle, monseigneur de Beaugeu le pere et le filz et plusieurs autres que je ne puis mye maintenant tous nommer et qui bien seront tous en temps et en lieu ramenteuz. Car pour verité dire et soustenir on doit bien tenir pour asséz preux tous ceulx qui en sy crueuses batailles et sy perilleuses ont esté veüz et demouréz jusques a la desconfiture souffisantment faisant leur devoir.
SHF 1A-1 sync Comment le roy Edouart fut couronnéz a Londres, et de l’oppinion des Angloys.Premierement pour mieulx entrer en la matiere de honnourable et puissant hystoire du noble roy Edouart pb 2 v