pb 73 vGap: sampling
SHF 1-123 sync Comment les seigneurs qui estoient demouréz en Escoce, cappitaines par le commandement du roy de France, recouvrerent pluseurs forteresces sur les Anglois.Vous devéz savoir que messire Guillaume de Donglas, filz du frere a messire Guillaume de Donglas qui demoura en Espaigne, si comme dit est ci dessus, le jeune conte de Moret, le conte de Patris, messire Robert de Versi, messire Simon Fraisel et Alixandre de Ramesay estoient demouréz cappitaines du remanant d’Escoce et se tenoient et tindrent longuement en ces forests de Ghedours par yver temps et par esté, par l’espace de sept ans et plus, comme tres vaillans gens et guerroioient tousjours les villes et les forteresces ou le roy Edouart avoit mis ses gens et ses garnisons et souvent leur avenoit de belles aventures et perilleuses, desquelles ilz se partoient a leur honneur, par quoy on les doit bien compter entre les preux et aussi fait on. Si avint en ce temps que le roy anglois estoit pardeça et guerroioit le royaume de France et seoit devant Tournay, que le roy Phelippe envoya gens en Escoce, qui arriverent en la ville de Saint Jehan et prioit adont le roy de France a ces dessus nomméz d’Escoce qu’ilz voulsissent esmouvoir et faire guerre si grant sur le royaume d’Angleterre qu’il couvenist que le roy anglois s’en ralast oultre et deffeist son siege de Tournay et leur promist aide de puissance de gens et d’avoir. Siques en ce temps que le siege fut devant Tournay, ces seigneurs d’Escoce se pourveirent a la requeste du roy de France pour une grant chevauchee sur les Anglois.
¶ Quant ilz furent bien pourveus de grans gens ainsi qu’il leur
failloit, ilz se partirent de la forest de Gedours et alerent par toute Escoce reconquerir par toute Escoce des forteresces celles qu’ilz peurent ravoir. Et passerent oultre la bonne ville de Bervich et la riviere de Thun et
entrerent ou païs de Northombrelande, qui jadis fut du royaume
d’Angleterre. La trouverent ilz grant foison de bestes grasses. Si gasterent tout
le païs et ardirent jusques a la cité de Durenne et asséz oultre. Puis s’en retournerent par un autre chemin, gastant et ardant tout le païs, tant qu’ilz
destruirent bien en celle chevauchee trois journees loing du païs
d’Angleterre et puis rentrerent dedens la païs d’Escoce et
reconquirent toutes les forteresces que le roy anglois tenoit hors mis la bonne cité de Bervich et trois autres fors chasteaux, qui leur faisoient trop grant ennuy et souvent et par les vaillans gens qui les
gardoient et le païs d’entour aussi et estoient et sont encores ces trois chasteaux si fors que a peinnes pourroit on trouver si fors en nul païs.
Et appelle on l’un Strumelin, l’autre Rosebourch,
et le tiers le souverain d’Escoce, Hamdebourch. Le chastel
de Hamdebourch siet sur une haulte roche, par quoy on voit tout le païs d’environ. Et est la montaingne si
roide que a peinnes y puet pb 74 r