pb 90 rtiel, qui estoit adont uns des fors dou monde et le mains prendable. De quoy chil dou païs environ furent bien esmerveilliet quant il en oirent lez nouvelles especialment chil de le chité de Thoulouse car c’est a VII lieuwez priés. Et depuis, quant li escuiers qui Aguillon avoit rendu, vint a Thoulouse, ly homme de le ville le prisent et le amisent de traïson et le pendirent sans merchy. Quant li contes d’Erbi eut le saisine de le ville et dou chastiel d’Aguillon, il en fu si resjois qu’il n’euist miez esté ossy liés se ly rois d’Engleterre euist d’autre part conquis C M florins pour le cause de ce qu’il le veoit bien seant, et en bonne marce, en le pointe de deus grosses rivierez portans navie et le rafresci et rempara de tout ce qu’il besongnoit et ensy que pour avoir y son retour et faire ent sen garde corps. Et quant il s’en parti il le leissa en le garde d’un bon chevalier sage et vaillant, qui s’appelloit messires Jehan de Gombri. Puis chevauça oultre ly conte a toute son host et vint a I chastiel que on appelle Sograt, sy le conquist par assaut, et furent mort tout ly saudoiier estragne qui dedens estoient et de la endroit il s’en vint devant le ville de Le Riolle.
SHF 1-227 syncOr vint ly contes Henri d’Erbi a toutes ses gens devant Le Riolle et le assega fortement et destroitement de tous costés et mist bastides sus les chemins en tel maniere que nullez pourveances ne pooient venir ne entrer dedens le ville. De le ville et dou chastiel de Le Riolle estoit chapitainne pour le temps uns chevaliers de Prouvenche qui se nommoit messires Agos des Baus et avoit desous lui et en se carge pluisseurs bons compagnons, qui le ville tinrent souffisamment. Si vous dy que il y eut fais pluisseurs grans assaus car priesque tous les jours y assalloit on et traioient et escarmuchoient li archier a chiauls de dedens, sy en y avoit souvent des blechiés des uns et dez autres. Tant y fu li siege que en le saison moult avant, car chil de le Riolle quidoient estre conforté dou roy de France ou dou duch de Normendie mes non furent. Dont il convint que chil de Montsegur se mesissent en l’obeissance dou roy d’Engleterre par le composition dessus ditte. Et y envoia li conte d’Erbi seant devant Le Riolle le signeur de Manny pour tant qu’il avoit fait le premier tretié de le composition et leur remonstra sur quoy et comment il estoient composé et que de che il avoient livret hostage. Chil de Montsegur veirent bien qu’il ne pooient plus variier; sy se rendirent et devinrent homme par feaulté et hommage au conte d’Erbi, qui representoit en cez coses le personne dou roy d’Engleterre. Et meismement messires Huge de Batefol devint homme ossy au dit conte avoecquez chiaus de Montsegur et jura feaulté et hommage et parmy tant il demora gardiiens et chapitainne de le ville de Montsegur a certains gages qu’il avoit dou conte d’Erbi pour lui et pour ses compagnons.
SHF 1-228 syncLy Engléz qui seoient devant Le Riolle et qui y furent plus de IX sepmainnes, avoient fait ouvrer et carpenter deus berefrois de gros mairiiens a trois estages et seant cescun berefroy sus quatre rues et estoient chil berefroy au lés deviers le ville tout couvert de quir boulit pour deffendre dou tret et dou feu et avoit en cescun estage C archiers. pb 90 v