pb 88 rchiaus qui avoecquez euls estoient et puis monterent a cheval et issirent de le fortreche et s’en vinrent sus lez camps et se bouterent ou plus fort de le bataille: ce rafresqui et resvigura grandement les Englés. SHF 1-221 sync Que vous feroie je lonch parlement? Chil de le partie le conte de Laille furent la tout desconfi et priesque tout mort et tous pris, ne ja ne s’en fust nuls escapés se la nuis ne fust sy tols venue. La i eut pris que contes que viscontes jusques a IX et des barons et des chevaliers et des escuiers tel fuison qu’il n’i avoit homme d’armez des Englés qui n’en euist deus ou trois dou mains. Ceste bataille fu desous Auberoche, le nuit saint Leurent, l’an de Grasce M CCC XLIIII.³¹

Appriés le desconfiture qui fu la sy grande et sy grosse pour lez Gascons et sy adamagablez car il estoient la venu en grant arroi et en bonne ordenance, mes petitte songne lez fist perdre ensy qu’il apparu, ly Englés, qui estoient mestre et signeur dou camp, entendirent a leur prisonniers et comme gens qui leur ont toudis esté courtois, leur fisent tresbonne compagnie et en recrurent assés sus leurz fois a revenir dedens I certain jour a Bourdiaus ou a Bregerach, il se traisent dedens Auberoche et la donna a souper li contes d’Erbi le plus grant partie des contes et des viscontes qui prisonniers estoient, et ossy lez chevaliers de se compagnie. Sy devés croire et sçavoir qu’il furent celle nuit en grant reviel et rendirent grans grasces a Nostre Signeur de le belle journee qu’il avoient eu quant une puignie de gens qu’il estoient, environ M combatans uns c’autres parmy les archiers, en avoient desconfi X M et plus et rescous le ville et le chastiel d’Auberoce et lez chevaliers leurs compagnons qui dedens estoient moult astraint et qui dedens deus jours euissent esté pris et en le volenté de leurz ennemis. Quant ce vint au matin ung peu appriés soleil levant, ly contes de Pennebrucq vint a bien CCC lancez et CCCC archiers, qui ja avoit esté enfourmés sus son chemin de l’avenue de le bataille. Sy estoit durement courouchiés de ce qu’il n’i avoit esté et en parla par mautalent au conte d’Erbi, et dist: "Certes, cousins, il me samble que vous ne m’avés fait maintenant point d’onneur ne de courtoisie, quant vous avés vos ennemis combatus sans moy, qui m’aviés mandé sy a certes et bien pooiéz sçavoir que je ne me fuisse jamés souffers que je ne fuisse venus." Dont respondi li conte d’Erbi et dist tout en riant: "Par ma foy, cousins, nous desirions bien vostre venue, et nous souffresions toudis en vous sourattendant dou matin jusquez a viespres, et quant nous veismez que vous ne veniés point, nous en estions tout esmerveilliet, sy n’osammes plus attendre que nostre ennemi ne seuissent nostre venue, car, se il le seuissent, il euissent eu l’avantage sur nous et, Dieu merchy, nous l’avons eu sur iauls, sy les nous aiderés a garder et a conduire jusques a Bourdiaus." Adont se prisent par lez mains et entrerent en une cambre et issirent de ce pourpos, tantos fu heure de dinsner. Sy se misent a table, si mengierent et burent tout aise et a grant loisir des pourveances des Franchois qu’il avoient amené devant le chastiel de Auberoche, dont il estoient bien raempli. Tout ce jour et le nuit enssivant se tinrent il en Auberoche et l’endemain au matin il furent tout armé et tout monté, sy se partirent de Auberoche et y laissierent a chapitainne et a gardiien I chevalier gascon, qui toudis avoit estet de leur partie, qui pb 88 v