pb 86 rd’Erbi, li contes de Kenfort,²⁹ messires Gautier de Manni et ly aultre et chevaucierent deviers Bourdiaus et tant fisent qu’il y parvinrent.

Au retour que li conte d’Erbi fist en le chité de Bourdiaus, fu il liement requeilliés et recheus de toutes gens et widierent li clergiet et li bourgois de le ville a grant pourcession contre lui et ly fisent toute honneur et reverense a leur pooir et ly abandonnerent vivres et pourveances et toutes aultres coses a prendre ent a se aise et volenté. Ly contes leur remerchia grandement de leur courtoisie et de ce qu’il li offroient. Ensy se tint li conte d’Erbi en le chité de Bourdiaus avoecquez ses gens. Si s’esbatoit et jeuoit entre lez bourgois et les dammes de le ville. Or lairons nous I petit a parler de lui et parlerons dou conte de Lille, qui se tenoit en Le Riolle et sçavoit bien tout le conqués que li contes d’Erbi avoit fait, et point n’i avoit peut pourveir de remede. Sy entendi li dis contes de Laille que li conte d’Erbi estoit retrés au sejour en Bourdiaus et avoit espars ses gens et rompu se chevaucie et n’estoit miez apparant que de le saison il en fesist plus. Sy s’avisa li dis contes qu’il feroit une semonse et un mandement especial de gens d’armez et iroit mettre le siege devant Auberoche, ensy qu’il l’avisa, il le fist. Sy escripsi deviers le conte de Pieregort, celi de Quarmaing, celi de Conmignes, celi de Villemur, celi de Brunikiel et deviers tous les barons de Gascongne, qui françois se tenoient, qu’il fuissent sus I jour qu’il leur assigna, devant Auberoce car il y voloit aler et mettre y le siege. Ly dessus dit conte, visconte et baron de Gascongne obeirent a lui car il estoit comme rois ens es marches de Gascongne et assamblerent leurs gens et leurs hommez et furent tout apparilliet au jour qui assignés y fu et vinrent devant Auberoce tellement que li chevalier dessus dit, qui le gardoient, ne s’en donnerent de garde, sy se veirent assegiet de tous costés. Ensy que gens de bon convenant et de grant arroy il ne furent de riens esbahi mes entendirent a leurs gardes et a leurs deffenses. Ly conte de Laille et li aultre baron qui la estoient venu moult poissamment, se logierent tout anviron tellement que nuls ne pooit entrer ne issir en le garnison, qu’il ne fust appercheus et envoiierent querre IIII grans engiens a Thoulouse et les fisent la achoroiier et puis drechier devant le fortreche et n’assalloient li Franchois d’autre cose fors de ces engiens, qui nuit et jour jettoient pieres de fais ou chastiel. Che lez esbahissoit plus c’aultre cose car dedens VI jours il desrompirent le plus grant partie des comblez des tours et ne s’osoient li chevalier ne chil dou chastiel tenir, forz ens es cambres votees par terre, c’estoit ly intension de chiaus de l’oost qu’il les ochiroient la dedens, ou il se renderoient simplement. Bien estoient venues les nouvellez a Bourdiaus au conte d’Erbi et a monsigneur Gautier de Manni que leur compagnon estoient assegiet dedens Auberoche mes point ne sçavoient qu’il fuissent sy apressé ne sy constraint qu’il estoient.

Quant messires Franke de Halle et messires Alains de Sinefroide et messires Jehans de Lindehalle veirent le oppression que li Franchois leur faisoient, et sy ne leurz apparoit confors ne aide de nul lés, sy se conmenchierent a esbahir et se consillierent entre iauls comment il se poroient maintenir. "Il ne puet estre", disent il, "que se li contes d’Erbi sçavoit le dangier ou chil Franchois nous tiennent, qu’il ne nous secourust, a quel meschief que che pb 86 v