pb 83 vrons tout le nostre et nos vies ossy. Sy vaurroit mieux que nous le rendissions au conte d’Erbi que dont que nous euissions plus grant damage." Adont respondi li contes de Laille et dist: "Alons, alons celle part ou vous dittes que li perils est car nous ne le renderons pas ensy." Lors s’en vinrent li chevalier et li escuier de Gascongne qui la estoient, contre ces pallis et se misent tout au deffendre de grant corage. Ly archier, qui estoient en leurs barges, traioient si ouniement et si roit que a painnes se pooit nuls apparoir se il ne se voloit mettre en aventure d’estre mors ou trop mallement blechiés. Par dedens le ville avoecquez lez Gascons avoit bien CC arbalestriers genevois, qui trop grant pourffit leur fisent, car il estoient bien pavesciet contre le tret des Engléz et ensonniierent tout ce jour grandement lez arciers d’Engleterre. Sy en i eult pluisseurs blechiés d’une part et d’aultre. Finablement ly Englés, qui estoient en leur navie, s’esploitierent tellement qu’il rompirent ung grant pan dou palis. Quant chil de Bregerach veirent le meschief, il se traisent avant et requisent a avoir respit, tant qu’il fuissent consilliet pour iauls rendre. Il leur fu accordée le parfait dou jour et le nuit ensievant jusques a solel levant, sauf tant qu’il ne se debvoient de riens fortefiier. Ensi se retray cescuns a son logeis. Celle nuit furent en grant consel li baron de Gascongne qui la estoient, assavoir comment il se maintenroient. Iauls bien consilliet il fisent ensieller leur chevaus et cargier de leur avoir et monterent et se partirent environ mienuit, et chevauchierent viers le ville de Le Riolle, qui n’est mies loing de la. On leur ouvri les portes, sy entrerent ens et se logierent, et herbegierent parmy le ville. Or vous dirons de chiaus de Bregerach coment il finerent.

Quant ce vint au matin, li Englés qui estoient tout conforté d’entrer en le ville de Bregerach, fust bellement ou aultrement, entrerent derechief en leur navie, et vinrent tout nagant a cel endroit ou il avoient rompu les palis, sy trouverent illuecq grant fuison de chiaus de le ville qui estoient tout avisé d’iauls rendre, et priierent as chevaliers qui la estoient, qu’il vosissent priier au conte d’Erbi qu’il les vosist prendre a merchi, salve leurs corps et leurs biens, et en avant il se meteroient en l’obeissance dou roy d’Engleterre. Ly contes de Pennebruq et li contes de Kenfort²⁹ respondirent qu’il en parleroient volentiers et puis demanderent il ou ly conte de Laille et li aultre baron estoient. Il respondirent: "Certainnement nous se sçavons car il cargierent, et tourserent tres le mienuit tout le leur et se partirent mez point ne nous disent quel part il se trairoient." Sus ces parolles se partirent ly doy conte desus nommet et vinrent au conte d’Erbi, qui n’estoit miez loing de la, et li monstrerent tout che que lez gens de Bregerach voloient faire. Li dis contes d’Erbi, qui fu moult noblez et tres gentils de cuer, respondi: "Qui merchy prie, merchy doibt avoir. Dittes leur qu’il oevrent leur ville et nous leissent ens, nous les assegurons de nous et des nostres." Adont retournerent ly doy signeur dessus dit et recorderent a chiauls de Bregerac tout ce que vous avés oy. Dont il furent moult joiant, quant il veirent qu’il pooient venir a paix. Sy vinrent en le place et sonnerent les sains et se assamblerent tout, hommes et femmes, et fisent ouvrir leurs portes et vinrent a grant pourcessions et moult humlement pb 84 r