pb 81 rde men cousin le conte d’Erbi, qui chy est, qui en a priiet, mes que vous voelliés faire ce que diray." Ly chevalier eut grant joie quant il vei qu’il n’aroit garde de mort. Sy respondi en lui moult humeliant: "Chieres sires, je feray a mon pooir loiaument tout ce que vous me conmanderés." Lors dist li rois: "Messire Hervi, je sçay bien que vous estes uns des riches chevaliers de Bretagne et que, se je vous voloie presser, vous paiieriés bien XXX M ou XL M escus. Je vous diray que vous ferés. Vous irés deviers mon adversaire Phlippe de Valois et li dirés depar moy que pour tant qu’il a mis a mort villainne sy vaillans chevaliers et sy gentils que chil estoient de Bretagne et de Normendie en mon despit, je dy et voel porter oultre qu’il a enfraint et brisiet les trieuwes que nous avions ensamble. Sy y renonche de mon costé et le deffie de che jour en avant et parmy tant que vous ferés che message, je vous laissera passer sur X M escus que vous paierés ou envoierés a Bruges dedens V mois appriés che que vous arés repasset le mer. Et encores dirés vous a tous chevaliers et escuiers depar de dela que pour ce ne laissent il mies a venir a nostre fieste car nous les y verrons moult volentiers et aront sauf alant et sauf venant et XV jours apprés le fieste." "Monsigneur," ce dist lors messires Hervis, "je furniray vostre message a mon pooir et Dieux vous voelle merir le courtoisie que vous me faites et a monsigneur le conte d’Erbi ossy!" Depuis ceste ordenance ne demora gaires en Engleterre messires Hervis de Lion mez eut son congiet et se parti dou roy et des barons et vint a Hantonne. La entra il en ung vassiel en mer et avoit intension d’ariver a Harflues mes uns tourmens le prist et queilla sus mer, qui leur dura plus de V jours et furent perdu tout leur chevauls et jetté en le mer et messires Hervis sy tourmentés que onques depuis il n’eut santé. Touttefois a grant meschief au XVe jour li maronnier prisent terre au Crotoy. Sy vinrent tout a piet messires Hervis et ses gens jusques a Abeville. La se monterent il mez messires Hervis estoit sy travilliés qu’il ne pooit souffrir le chevaucier et se mist en littiere, et vint a Paris deviers le roy Phlippe et fist son message bien et a point. Depuis, si comme jou ay oy recorder, ne vesqui il point longement mes morut en ralant en son païs en le cité d’Angiers.
SHF 1-205 syncOr approcha li jours saint Jorge que ceste grant feste se devoit tenir ou chastiel de Windesore, et y fist li rois grant apparel et y furent dou roiaume d’Engleterre conte, baron et chevalier, dammes et damoisielles et fu la feste moult grande et moult noble, bien fiestee et bien joustee et dura par le terme de XV jours et y vinrent pluisseur chevalier de decha le mer, de Flandres, de Haynnau et de Braibant, mes de France n’en i eult nuls. La feste durant et seant, pluiseurs nouvellez vinrent au roy de pluisseurs païs et par especial il y vinrent chevalier de Gascongne, li sires de Lespare, li sirez de Chaumont et li sirez de Muchident, envoiiés depar les aultres barons et chevaliers qui pour le temps de lors se tenoient engléz, tels que le signeur de Labreth, le signeur de Pumiers, le seigneur de Monferrat, le signeur de Lauduras, le signeur de Courton, le signeur de Longerem, le signeur de Graili et pluisseur aultre tout en l’obeissanche le roy d’Engleterre et ossy depar le chité de Bourdiaus et ceste de Bayone. Sy furent li dessus dit messagier moult bien venu, bien requeilliet et conjoy dou roy d’Engleterre et de son consel. Sy remonstrerent pb 81 v