pb 7 vgouvernés que estet n’avoit, et que li peres feuist bien gardés et honnestement tenus tant comme vivre poroit selonc sen estat.
SHF 1-21 syncEnsi comme acordet fut par les plus hauls barons et par les consauls des bonnes villes, fu il fait et fu adont couronnés de couronne roial ens ou palais de Wesmoustier dalés Londres li jovenes rois Edouwars, qui tant a estet ewireus et fortunés en armes. Che fu l’an de grasce Nostre Signeur mil trois cens XXVI, le jour dou Noel. Et pooit avoir adont environ XVI ans, il les eut a le Conversion saint Pol apriés. Et la fu tres grandement honnourés et servis li gentils chevaliers messires Jehans de Hainnau de tous les prinches et de tous les nobles et non nobles dou paÿs. Et la furent donnet grans joiauls et tres riches et a tous les compagnons qui demoret estoiient dalés lui. Et demora depuis ils et si compagnon en grandes fiestes et en grans solas des signeurs et des dames qui la estoient jusques au jour des Trois Rois que il oÿ dire que li rois de Behagne, li contes de Hainnau, ses freres, et grant plentet de signeurs de France se ordonnoiient pour estre a Condet seür Escaut, a I tournay qui la estoit criés. Adont ne vault messires Jehans de Hainnau plus demorer pour priiere que on li peuuist faire pour le grant desir qu’il avoit de venir a che tournoy et de veir sen gentil frere, le conte et les aultres signeurs qui la devoiient estre. Et espetiaulment le plus noble et le plus gentil roy en largueche qui regnast a che tamps, le gentil roy Carlon de Behagne. Quant li jovenes rois Edouwars, madame la roine sa mere et li baron qui la estoiient, veirent que il ne voloit plus demorer, et que priere n’y pooit valoir, il li donnerent congiet moult a envis. Se li donna li jovenes rois par le consel de madame se mere quatre cens mars d’estrelins, I estrelin pour I denir, de rente hiretablement a tenir de lui en fief et a paiier casqun an en le ville de Bruges. Et donna encores a Phelippe de Castiax, son mestre escuiier et sen souverain consillieur, cent mars de rente a l’estrelin. Et ensi a paiier que dit est. Et li fist avech ce delivrer grant somme d’estrelins pour paiier les frés de li et de toute se compagnie pour revenir en leur paÿs. Et le fist conduire a grant compagnie de chevaliers jusques a Douvres. Et li fist apparillier et delivrer tout son passage et les dames meismes, la contesse de Garanes, qui estoit soer au conte de Bar, et aucunnes des aultres dames li donnerent grant plentet de biaus jeuiauls et riches au departir. Quant messires Jehans de Hainnau et se compagnie furent venut a Douvres, il monterent tantos en naves pour passer oultre pour le desir qu’il avoiient de venir a tamps et a point a che tournoy qui devoit estre a Condet. Et en mena avech lui quinze jovenes et preus chevaliers d’Engleterre pour estre a che tournoy avech lui, et pour iauls acointier as signeurs et as compagnons qui la devoiient estre. Si leur fist toute l’onneur et le compagnie qu’il peut. Et tourniierent II fois celle saison a Condet puis qu’il furent venut. Or me voel taire de monsigneur Jehan de Hainnau dusques a tant que poins sera. Et revenray au jovene roy Edouwart d’Engleterre.
SHF 1-22 syncApriés chou que messires Jehans de Hainau se fu partis dou jovene roi et de madame sa mere, li dis rois et le roine gouvernerent le paÿs par le consel dou conte de Kent, oncle au dit roi. Et par le consel ossi monsigneur Rogier, signeur de Mortemer, qui tenoit grant terre en Engleterre bien sept mille livrees de revenue, I estrelin pour un denier. Et avoiient tout doi estet bani et escachiet hors d’Engleterre avech le roine, et le dit roy, si comme vous avés oy. Et userent ossi assés par le consel monsigneur Thumas Wage. Et par le consel de pluiseurs aultres que on tenoit les plus sages dou roiaulme, comment que aulcun aultre en euwissent envye. Car on dist ensi que oncques Enviie ne fu morte en Engleterre. Ossi resgne elle et voelt resgner en pluiseurs aultres paÿs. Ensi passa li iviers et li Quaresmes jusques a Pasques. Et furent li rois, madame se mere et li paÿs tous en paix che terme. Avint que li rois Robers d’Escoche, qui avoit estet moult pres et qui moult avoit souffert contre les Englés et moult de fois avoit estet decachiés et desconfis au tamps le bon roi Edouwart, tayon a che jovene roy Edouwart, estoit devenus moult vieuls et malades de le grosse maladiie, che disoit on. Quant il sceut les avenues d’Engleterre pb 8 r