pb 53 vme baillerés se il vous plaist dusques a VIC hommes a faire me volentet et je les menray devant vostre host par l’espasse de quatre lieuues de terre et porteray le baniere de Bretagne devant my. Je ay dedens Hambon I frere qui est gouvreneres dou castiel et de le ville. Tantos qu’il vera le baniere de Bretagne et il me congnistera, il me fera ouvrir le porte et je enteray dedens a toutes mes gens et me saisiray de le ville et des portes et prenderay men frere. Et le vous renderay pris et a vostre volenté, se tantos il n’obeist a my. Mais que vous me proumetés que dou corps nul mal ne li ferés." "Par men chief," dist li contes, "nennil et vous estes bien avisés et vous ameray miex que devant a tourjours mais, se par ensi faites que je soiie sires de Hambon, de le ville et dou castiel."

Adonc se parti messires Henris de Pennefort de le route dou conte, en se compagniie bien VIC armeures de fier et chevaucha I jour tout je jour. Et seür le viespre il vint en Hambon. Quant Oliviers de Pennefort ses freres sceut que messires Henris venoit la, si en eut grant joye et quida tout chertainnement que che fuist pour lui aidier a garder le ville, si le laissa ens et ses gens d’armes. Et vint contre lui seür le rue. Sitos que messires Henris le vei, il s’approcha de lui. Et le prist et li dist: "Oliviers, vous estes mes prisonnier." "Comment che?" respondi Oliviers. "Messire Henry, je me sui confiiés en vous et quidoiie que vous venissiés chi pour moi aidier a warder et a deffendre ceste ville et che castiel." "Biaus freres," dist messires Henris, "il ne va point ensi, je m’en mach en saisinne et en possession depar le conte de Montfort, qui presentement est dus de Bretagne et a qui j’ay fait feautet et hommage. Et tous li plus grant partiie dou paÿs ossi. Si obeirés ossi. Et encores vault miex que che soit par amours que par forche, et vous en sara messires gregnieur gret." Tant fu Oliviers de Pennefort preechiés et amonnestés de monsigneur Henri sen frere, qu’il s’accorda a lui et au conte de Montfort ossi, qui entra dedens Hambon a grant joie. Et fu plus liés de le prise et saisinne de Hambon que de tels quarante castiauls sont en Bretagne. Car il y a boine ville et grosse et bon port de mer. Si se saisi tantos de le ville et dou fort castiel. Et mist dedens ses gens et ses garnisons et puis si se traist a toute sen host pardevant le chitet de Vennes et fist tant parler et traittier as bourgois et a chiauls de Vennes qu’il se rendirent a lui et li firent feaulté et hommage comme a leur signeur. Il establi en le chitet toutes manieres d’officiiers. Et y sejourna deux jours. Au tierch jour il s’en parti et ala assegier I trop fort castiel seant seür un hault tee tertre sëur le mer que on claime le Rocheperiot. Si en estoit castellains uns vaillans chevaliers et moult gentilshoms que on appelloit monsigneur Olivier de Clichon, cousins germains au signeur de Clichon. Et sejourna pardevant a siege fait plus de dix jours que oncques ne peut trouver voye par quoi il peuuist le castiel gaegnier, si fors estoit il. Et si ne pooit trouver accord au gentil chevalier, par quoi il vausist obeir a lui par proumesses ne par maneches qu’il li peuuist faire. Si s’en parti a tant et laissa le siege jusques adont que plus grans pooirs li venroit. Et ala assegier I aultre castiel a X lieuues priés de la que on clamoit castiel d’Auroy. Et en estoit castellains uns moult gentils chevaliers que on appelloit monsigneur Joffroy de Malattrait. Et avoit a compagnon monsigneur Yvon de Tigri. Li dis contes fist assallir deux fois a celi castiel. Mais il vei bien qu’il y poroit plus perdre que gaegnier. Si s’accorda a une trieuue et a jour de parlement par le pourcahch monsigneur Henry de Lyon, qui adont estoit avech li. Li parlemens se porta si bien que au pardaerrain il furent boin amy. Et firent li doi chevalier feaultet au dit conte. Et demorerent gardiien dou dit castiel et de celi paÿs depar le dit conte. A tant se parti li contes de la et mena son host pardevant I aultre fort castel assés priés de la que on claiime Goy le Foriest. Chils qui castelains en estoit, veoit que li pb 54 r