pb 41 rrains de ceste emprise. Mais il s’ordonnoit par le consel dou roy sen pere. Quant chil de Thun l’Evesque veirent leur signeur le conte de Hainnau venut si poissanment, si en furent moult joiant. Che fu bien raisons. Car moult l’avoiient desiret et bien en pensoiient a estre delivret. Le quatrime jour aprés qu’il furent la venut et ostilliet a host, vinrent chil de Valenchiennes en grant arroy. Desquelz Jehans de Baisi, qui prevos estoit pour le tamps, se faisoit maistres et gouverneres. Sitretos que chil de Valenchiennes furent venut, on les envoiia escarmuchier as Franchois seür le rivage de l’Escaut pour ensonniier chiaus de l’ost et pour faire chiaus de le garnison de Thun voiie. La eut grant escarmuche des uns as aultres. Et pluiseur quariel trait et lanchiet et tamaint homme navret et bleciet. Entrués qu’il entendoiient au palater, li compagnon de Thun l’Evesque, messires Richars de Limozin et li aultre se partirent dou castiel et se mirent en l’Escaut. En l’eure eurent apparilliet batiaus et nachelles, en quoi on les ala querre d’aultre part le rivage, si furent amenet en l’ost et deviers le conte de Hainnau, qui liiement et doulchement les rechupt et les honnera moult dou boin serviche qu’il li avoiient fait, quant si longement et a tel meschief il s’estoiient tenut en Thun l’Evesque.

Entrués que ces deux hos estoiient ensi assamblees pour le fait de Thun l’Evesque et logies seür le riviere d’Escaut, li Franchois deviers Franche et li Hainnuier seür leur paÿs, couroiient li foureur fourer la ou partout trouver il le pooiient de l’un lés, et de l’autre. Mais point ne se trouvoiient ne encontroiient. Car la riviere d’Escaut estoit entre deux. Mais li Franchois parardirent et coururent tout le paÿs d’Ostrevant, che qui demoret y estoit. Et li Hainnuier tout le paÿs de Cambresis. Et la vint en l’aide dou conte de Hainnau et a se priiere, Jakemes d’Artevelle a plus de sissante mille Flamens tous bien armés. Et se logierent poissanment a l’encontre des Franchois. Quant il furent venut, moult en fu li contes de Hainnau liés. Car sen host estoit grandement renforchiet. Si manda par ses hiraus au duch de Normendiie, sen cousin, que bataille se peuist faire entre iauls et que che saroit blasmes pour toutes les partiies se si grant gent d’armes qui la estoient se deppartoient sans bataille. Li dus de Normendiie respondi a le premiere fois qu’il en aroit advis. Chils advis et consauls fu si lons que li hiraut s’en partirent adont sans avoir chiertainnes responses. Dont il avint que le tierch jour apriés li contes derechief y renvoia pour miex savoir l’intention dou dit duch et des Franchois. Li dus en respondi qu’il n’estoit mies encores bien consilliés de combatre, ne de mettre y journee. Et dist encores ensi que li contes de Hainnau estoit trop hastieus. Quant li contes oÿ ces parolles, se li sambla uns detriiemens, si manda tous les plus grans barons del host, et premiers li dus de Braibant, sen grant signeur, et tout li aultre ensievant. Et puis leur remonstra sen intention et les responses dou duch de Normendiie, si en demanda a avoir consel. Adont regarderent il chescuns l’un l’autre. Et ne vault nuls respondre premiers. Toutesfois li dus de Braibant parla pour che que c’estoit li plus grans de toute l’ost et tenus li plus sages, si dist, que de faire I pont ne de combatre as Franchois il n’estoit mies d’accord. Car il savoiient de certain que li rois englés devoit prochainnement passer le mer et venir assegier le chitet de Tournay: "Se li avons", che dist li dus, "proumis et juret foy, sen amour et aide de nous et des nostres. Dont se nous nos combatiemes maintenant et li fortune feuist contre nous, il perderoit I voiage, ne nul confort il n’aroit de nous. Et se li journee estoit pour nous, il ne nous en saroit ja gret. Car c’est se intention que ja sans li, qui est chiés de ceste guerre, nous ne nos combatons au pooir de Franche. Mais quant nous serons devant Tournay, il avech nous, et nous avech li, et li rois de Franche sera d’aultre part, a envis se deppartiroiient si grans gens sans bataille. Si vous conselle, biaus fils, que vous vo departés de chi, car vous y sejournés a grant frait, et donnés congiet toutes manieres de gens d’armes, si s’en revoist chescuns en se plache. Car dedens X jours vous orés nouvelles dou roi d’Engleterre." A che consel se tinrent li plus grant partiie des signeurs qui la estoiient. Mais il ne pleut mies encores trop bien au conte de Hainnau. Et priia as signeurs et as barons tous en general qui la estoiient qu’il ne se vaulsissent mies encores partir. Car che seroit trop grandement, che li sambloit, contre sen honneur, se li Franchois n’espb 41 v