pb 37 vrouciés et brisa pour ceste avenue sen pourpos et sen emprise. Et donna ses Flamens congiet et s’en retourna en le ville de Gand.

Nous revenrons, car la matere le requiert, as guerres de Hainnau et a le contrevenganche que li contes i fist prendre par le duch Jehan de Normendiie, sen aisnet fil. Li dus au conmandement et ordenanche dou roi sen pere fist sen especial mandement a estre a Saint Quentin et la environ. Et se parti de Paris environ Pasques l’an mil CCC et quarante. Et vint a Saint Quentin. La estoient avecques lui li dux d’Athenes, li contes de Flandres, li contes d’Auchoirre, li contes de Sausoirre, li contes Raouls d’Eu, et li connestables de France, li contes de Porsiien, li contes de Roussi, li contes de Brainne, li contes de Grantpret, li sires de Couchi, li sires de Craon, et grant plentet de noble chevaleriie de Normendiie et des basses marches. Quant il furent tout assemblet a Saint Quentin ou la environ, si fu regardet par le connestable, le conte de Ghines, et les mareschaus de Franche, monsigneur Robert Bertran et monsigneur Mahieu de Triie, quel nombre de gens d’armes il pooiient estre. Si trouverent qu’il estoiient bien VIM armeures de fier, chevaliers et esquiiers, et bien VIII mille, que brigans, que bidaus, que aultres gens poursievant l’ost. C’estoit assés, si comme il disoiient entre iauls, pour combatre le conte de Hainnau et toute se poissanche. Si se mirent as camps par l’ordenanche des mareschaus. Et se partirent tout de Saint Quentin et s’arouterent devers le Castiel en Cambresis. Et passerent dehors Bohain. Et chevauchierent tant qu’il passerent le Castiel en Cambresis et s’en vinrent logier li dus de Normendiie et toute sen host, en le ville de Montais seür le riviere de Selles. Or vous diray une grant appiertise d’armes que messires Gerars de Werchin, senescaus de Hainnau pour le temps, fist et entreprist, le quelle doit bien estre recordee et tenue a grant proeche.

Li senescaus de Hainnau dessus nommés sceut bien par ses espiies que li dus de Normendiie estoit logés a Saint Quentin et que ses gens manechoiient durement le paÿs de Hainnau. Avecques tout che il sceut l’eure et le venue dou dit duch, qui estoit arestés a Montais dehors le fortereche dou Castiel en Cambresis. Si s’avisa en li meismes comme preus chevaliers et entreprendans qu’il iroit le duch escarmuchier et resvillier. Si priia aulquns chevaliers et escuiers, chou qu’il en peut trouver dalés lui, que il vausissent aler ou il les menroit. Et il li eurent en couvent. Si se parti de sen castiel de Werchin environ sissante lanches en se compagniie tant seulement et chevauchierent depuis solel escousant. Et firent tant que il vinrent a Forés a l’issue de Hainnau et a une petite lieue de Montais. Et pooit estre environ jour falli. Sitretos qu’il eurent chevauchiet oultre le ville de Forés, il fist toutes ses gens arester enmi uns camps et leur fist restraindre leurs armeures. Et rechengler leurs chevaus et puis leur dist se pensee et che qu’il voloit faire et il en furent tout joiant. Et li dirent qu’il s’enventuroiient volentiers avecques li, et ne le fauroiient jusques au morir. Et il leur dist grant merchis. Avecques li estoiient des chevaliers messires Jakemes dou Sart, messires Henris d’Ousphalize, messires Oulfars de Gistelles, messires Jehan dou Casteler, li sires de Vertain et li sires de Wargni et des escuiiers Gilles et Thieris de Souvain, Bauduins de fe Biaufort, Colebiers de Bruile, Moriaus de Lestines, Sandras d’Esquarmain, Jehans de Robersart, Bridouls de Thians, et pluiseur aultre. Puis chevauchierent tout quoiiement et vinrent a Montais et se bouterent en le ville et ne faisoiient li Franchois point de gait. Et deschendirent premiers li senescaus et tout li compagnon devant I grant hostel ou il quidoiient certainnement que li dus de Normendiie fuist. Mais il estoit I aultre hostel avant. Et laiens estoiient logiet II grant signeur de Normendiie, li sires de Bailloel et li sires de Briaultet. Si furent assalli vistement et li porte de leur hostel boutee oultre. Quant li doi chevalier se veirent ensi souspris et oirent criier Hainnau au senescal!, si furent moult esbahi. Nonpourquant il se mirent a deffense che qu’il peurent. Mais li sires de Bailloel fu la tués dont ce fu damages. Et li sires de Briautet fiancés prisons dou dit senescal et eut convent seür se foit de venir dedens trois jours tenir prison en Valenchiennes. Dont se commenchierent Franchois a estourmir pb 38 r