pb 33 vet entrassent en le terre monsigneur Jehan de Hainnau et le ardissent sans deport. Li dessus dit
obeirent au mandement dou roy. Che fu raisons. Et se quellierent secretement tant qu’il furent bien VC armeures de fier. Et
vinrent une matinee devant le bonne ville de Chymay et acquellierent
toute le proiie dont il en y trouverent grant fuison. Car les gens dou paÿs ne s’en
donnoiient garde. Et ne quidassent jamais que li Franchois deuissent passer si avant ne chevauchier oultre les bos de Tierasse. Mais si firent et ardirent tous les fourbours de Chimay et grant plentet de villages
la environ. Et priesque toute la tierre de Cimay, exceptet les fortereches.
Et puis se retrairent en Aubenton en Tierasse. Et la deppartirent il
leur pillage et leur butin. Ches nouvelles et ches complaintes en vinrent a monsigneur Jehan de Hainnau, qui se tenoit adont aen Mons en Hainnau dalés le conte
sen neveut. Si en fu durement courouchiés. Che fu bien raison. Et ossi fu li contes ses cousins. Car ses oncles tenoit ceste terre de lui.
Nonpourquant il s’en souffrirent tant c’a celle fois. Et n’en monstrerent nul
samblant de contrevenganche au roiaulme de Franche. Avech ches despis il avint que li saudoiier qui se tenoiient en le chitet de Cambray issirent hors de Cambray et vinrent a une
petite forte maison dehors Cambray qui s’appeloit Relenghes, le quelle estoit a
monsigneur Jehan de Hainnau. Et le gardoit uns siens fils bastars que
on nommoit monsigneur Jehan le Bastart. Et pooiient estre avecques li environ
XXV compagnon. Si furent assalli I jour tout le jour. Et trop bien se
deffendirent. Au viespre chil de Cambray se retrairent en leur chitet, qui manechierent a leur deppartement grandement chiauls de Relenghes et dirent bien que jamais n’entenderoiient a aultre cose, si les aroiient conquis et le maison abatue. Seür ches parolles li compagnon de Relenghes s’aviserent et regarderent le nuit que il n’estoiient mie fort assés
pour iauls tenir contre chiaus de Cambray, puisqu’il les voloiient ensi
aquellier. Car avech tout che qui bien les esbahissoit il estoit si fort gellet que on
pooit bien venir dusques as murs seür les fossés tous engellés. Si eurent consel qu’il
se partiroiient, ensi comme il firent. Et tourserent tout chou qui leur estoit et
widierent environ mienuit. Et bouterent le feu dedens Relenghes.
A l’endemain au matin chil de Cambray le vinrent par ardoir et
abatre. Et messires Jehans li Bastars et si compagnon s’en vinrent a Valenchiennes et puis se departirent il. Si s’en rala chescuns en se plache.
Vous avés chi en deseure bien oy recorder comment messires Gautiers de Manni prist par proeche et par grant fait d’armes le castiel de Thun l’Evesque. Et i mist dedens en garnison I sien frere que moult amoit que on clamoit monsigneur Gillion Grignart c’on dist de Manni. Chils faisoit tamainte envaiie et mainte salliie seür chiauls de Cambray et leurs portoie pluiseurs destourbiers. Et couroit priesque tous les jours devant leurs barrieres. En cel estat et en celle cremeur les tint il un grant tamps. Et tant qu’il avint que I jour moult matin il estoit partis de se garnison de Thun environ VIXX armeures de fier en se compagnie et s’en vint courir devant Cambray et jusques as barrieres. Li noise et li haros monta en le ville et tant que pluiseurs gens en furent moult effraet. Si s’armerent chesquns qui miex miex et monterent a cheval, chil qui chevaus avoient, et vinrent a le porte la ou li escarmuche estoit et ou messires Grignars de Manni avoit reboutés chiaus de Cambray. Si issirent cascuns qui mieus miex contre leurs ennemis. Entre les Cambrisiiens avoit uns jovenes canonne, appert homme d’armes durement fors, durs, hardis et appers. Et estoit chils Gascons et s’appelloit Guillaumes Marchant. Si se mist hors as camps avoech les aultres, montés seür boin coursier, le targe au col, le lanche ou poing et armés de toutes pieches. Si esporonna tout devant de grant corage. Et quant messires Gilles de Manni le vit venant vers lui, qui ne desiroit aultre cose que le jouste, si en fu tous joians. Et esporonna ossi vers li moult radement, si se consievirent de leurs lanches sans espargnier mout mervillieusement; dont ensi chei a Guillaume Marchant qu’il consievi monsigneur Gillion de Manni si roidement qu’il li piercha le targe de se lanche et toutes ses armeures, et li mist le lanche dalés le cuer et li fist passer le fier a l’autre lés. Et l’abati jus de sen cheval navret a mort. De ceste jouste furent si compagnon moult esbahi. Et chil de Cambray trop resjoy. Si se requellierent tout ensamble. La eut, je vous di, de premieres venues tres boin puigneis et fort. Et pluiseurs des uns et des aultres reverset par tierre. Et tamainte appertise d’armes faite. Finablement pb 34 r