pb 31 rinfourmés quel cose il devoit dire. Si se parti li dis hiraus de ses signeurs et chevaucha tant qu’il vint en l’ost franchoise et se traist deviers le roi de Franche et sen consel. Et fist sen message bien et a point. Et dist au roi de Franche comment li rois englés estoit arestés seür les camps et li requeroit a avoir bataille, pooir contre pooir. A le quelle requeste li rois de Franchois entendi volentiers et accepta le jour. Si me samble que che deult estre le venredi ensievant, dont il estoit merquedis. Si s’en retourna li hiraus ariere deviers ses signeurs bien revestis de boins mantiaus fourés que li rois de Franchois et li signeur li donnerent pour les riches nouvelles qu’il avoit aportees. Et recorda le boine chiere que li rois li avoit fait et tout li signeur de Franche.
SHF 1-85 syncEnsi et seür chel estat fu li journee accordee de combatre. Et fu segnefiiet a tous les compagnons de l’une host et de l’autre. Si se abillierent et ordonnerent, chescuns selonch che qu’il besongnoit. Le joedi au matin avint que doi chevalier au conte de Hainnau et de se delivranche, li sires de Fagnuelles et li sires de Tupegni, monterent seür leurs coursiers rades, fors et bien courans. Et se partirent de leur host entre iauls deux tant seulement pour aler veir l’ost as Englés et wardemaner. Si chevauchierent I grant tamps a le couverte toudis en costiant l’ost as Englés. Or eschei que li sires de Fagnuelles estoit montés seür I coursier trop merancolieus et mal affrenet, si s’effrea en chevauchant et prist sen mors as dens par tel maniere qu’il s’esquella et se demena tant qu’il fu maistres dou signeur qui le chevauchoit. Et l’emporta, vausist ou non, droit enmy les logeis le roy d’Engleterre et chei d’aventure entre mains d’Alemans, qui tantos cogneurent qu’il n’estoit mies de leurs gens. Si l’encloirent de toutes pars et le prirent. Et le cheval ossi et demora prisonniers, a V, ne sai, VI gentilshommes alemans, qui tantos le ranchonnerent et li demanderent dont il estoit. Et il respondi: "De Hainnau." Adont li demanderent il se il cognissoit monsigneur Jehan de Hainnau. Et il dist: "Oil." Et requist par amours que on le menast deviers lui. Car il estoit tous seürs que il le rapligeroit bien, se il voloient. De ches parolles furent li Alemant tout joiant et l’amenerent deviers le signeur de Biaumont, qui tantos avoit oy messe et fu moult esmervillés quant il vei le signeur de Fagnuelles, se li recorda chils sen aventure, si comme vous avés chi dessus oy. Et ossi de combien il estoit ranchonnés. Adont demora li sires de Biaumont le dit chevalier deviers ses maistres, et le raplega de se raenchon. Si se parti seür che li sires de Fagnuelles et revint arriere en l’ost de Hainnau deviers le conte et les signeurs, qui estoiient tout courouchiet de lui par le relation que li sires de Tupegni en avoit faite. Mais il furent moult joiant quant il le veirent revenut. Si se remerchia grandement au conte de Hainnau de monsigneur Jehan sen oncle, qui l’avoit raplegiet et renvoiiet sans peril et sans damage, fors de se raenchon tant seulement. Car ses coursiers li fu rendus et restitués a le priiere et ordenanche dou dessus dit monsigneur Jehan de Hainnau. Ensi se porta ceste journee et n’y eut riens fait, nient cose qui a recorder fache.
SHF 1-86 syncQuant che vint le venredi au matin, les deux hos se apparillierent et oirent messe, chescuns sires entre ses gens et en sen logeis. Et se acumenierent et confesserent li pluiseur et se mirent en boin estat, ensi comme pour tantos morir, se il besongnoit. Nous parlerons premiers del ordenanche des Englés, qui se trairent seür les camps. Et ordonnerent trois batailles bien et faitichement et toutes trois a piet. Et mirent leurs chevaus et tout leur harnois en I petit bos qui estoit derriere iauls et arouterent tout leur charoy par derriere iauls et s’en fortefiierent. Si eurent li dus de Guerles, li contes de Jullers, li marchis de Blanquebourch, messires Jehans de Hainnau, li marchis de Misse, li contes des Mons, li contes de Saumes, li sires de Fauquemont, messires Guillaumes de Douvort, messires Ernouls de Bakehen et li Alemant le premiere bataille. Et avoit en ceste premiere route XXII banieres et sixsante pennons. Et estoiient bien VIII mille hommes de boine estofe. Le seconde bataille avoit li dus de Braibant, si estoiient avecques lui tout li baron et li chevalier de sen paÿs. Premiers li sires de Kuk, li sires de Berghes, li sires de Bredas, li sires de Roselar, li sires de Vauselare, li sires de Baudresen, li sires de Bergneval, li sires de Sconpb 31 v