pb 25 vque vous aiiés l’accord de l’empereur et qu’il nous commande que nous deffions le roi de Franche depar lui. Car il ara bien droite ocquoison et vraiie par raison, si comme nous vous dirons. Et dechi en avant ne demorra nulle defaulte en nous que nous ne soiions apparilliet de faire chou que proumis vous avons sans nulle excusanche. Le cause que li empereres puet avoir de deffiier le roi de Franche est telle. Il est certain que convenenchiet a estet de lonchtamps et saiiellet et juret que li rois de Franche, quiconcques le soit, ne puet ne ne doit tenir ne acquerre riens seür l’Empire. Et chils rois Phelippes, qui a present resgne, a fait le contraire contre sen sairement. Car il a acquis le castiel de Crievecuer en Cambresis. Et le castiel de Alues en Pailluel et pluiseurs aultres hiretages en le ditte contet de Cambresis, qui est terre de l’Empire et hauls fiefs et relevee del empereur et l’a attribuet au dit roiaulme de Franche, par quoi li empereres a bien cause de lui deffiier et de faire deffiier par nous qui sommes ses subgés. Siques nous vous priions et consillions que vous y voellés painne mettre au pourcachier son accord pour nostre paix et honneur et nous i metterons painne avech vous a no loial pooir." Li rois englés fu tous confus quant il oÿ che raport. Et bien li sambla que che fust uns detriiemens et bien pensa que che venoit del advis le duch de Braibant sen cousin plus que des aultres. Toutesfois il considera assés qu’il n’en aroit aultre chose. Et que li courouchiers ne li pooit riens valoir, si en fist millieur samblant qu’il peut par emprunt. Et leur dist: "Ciertes, signeur, je n’estoiie mie avisés de che point et se plus tost en feuisse avisés jou en euwisse volentiers fait par vo consel et encores voel faire. Si m’en aidiés a consillier selonc chou que je sui decha le mer en estragne paÿs apassés. Et si i ay longement sejournet et a grant fret. Si m’en voellés donner bon consel pour vostre honneur et pour le mienne. Car sachiés, se jou ay en che cas nul blasme, vous n’i poés avoir honneur."
SHF 1-68 syncLonge cose saroit a racompter tous leurs consauls et toutes leurs parolles. Accordet fu entre iauls a le parfin que li marchis de Jullers iroit parler a l’empereur. Et iroiient des chevaliers et des clers le roi avech lui et dou consel le duch de Guerlles ossi, et feroiient le besongne a le millieur foi qu’il poroient. Mais li dus de Braibant n’y vault point envoiier. Mais il presta le castiel de Louvaing au roi pour demorer, si li plaisoit, jusques a l’estet. Car li rois leur avoit bien dit que nullement il ne s’en retourneroit en Engleterre. Car hontes et virgongne li saroit s’il s’en retournoit sans avoir fait partiie de sen emprise, de quoi si grant fame estoit, se li deffaulte n’en demoroit en iauls. Et leur dist qu’il manderoit le jovene roine se fame et tenroiient leur hostel ens ou castiel de Louvaing, puisque li dus ses cousins li avoit offiert. Ensi se depparti chils parlemens et creanterent tout chil signeur, li ung en le presence de l’autre, que jamais il ne querroiient nulle excusanche ne detriiement que de le fieste saint Jehan Baptiste qui seroit l’an mil CCC XXXIX en avant il seroiient ennemit au roi Phelippe de Franche. Et saroit chesquns apparilliés ensi que proumis avoit. Chescuns en rala en sen lieu. Li marchis de Jullers se meut a toute se compagnie pour aler vers l’empereur, si le trouverent a Floreberg. Pourquoi feroiie jou lonch sermon de leurs parolles ne de leurs requestes ? Je ne les saroiie racompter toutes entierement. Car je n’y fui nient. Mais li dis marchis de Jullers parla si gratieusement a monsigneur Loeis de Baiviere, empereur de Romme pour le tamps, qu’il firent toutes leurs besongnes et chou pourquoi il estoient la alet. Et i rendi madame Margerite de Hainnau se femme grant painne. Et fu adont li marchis de Jullers fais marchis de Jullers, qui en devant estoit contes de Jullers. Et li dux de Guerlles, qui estoit appellés contes, fais dux de Guerlles. Et le impetrerent ceste augmentation de nom ses gens qui la estoiient. Et ossi li empereres donna commission a quatre chevaliers et a II clers de droit, qui estoiient de sen consel et pooir, de faire le roy Edouwart sen vicaire par tout l’Empire. Et li donna grasce par quoi il peuuist faire monnoiie d’or et d’argent ou nom de lui et commandement que casquns de ses subgiés obeisist a lui comme au vicaire et comme a lui meismes. Et de che prirent li dessus dit instrumens publiques, confremés et saiellés souffissanment de l’empereur. Quant li dis marchis de Jullers eut fait toutes ses besongnes, ils et se compagnie se mirent au retour.
SHF 1-69 syncEn che temporal li jovenes rois pb 26 r