pb 14 rrablement les rechupt ossi
et les festia si souverainnement bien que longue cose seroit a racompter. Quant
assés festiiet furent, il firent leur message sagement et a point ensi comme quierkiet
leur estoit. Li contes les respondi moult courtoisement par le consel de monsigneur Jehan sen frere, et de madame la contesse, mere a le
damoiselle. Et leur dist que moult grans merchis a monsigneur le roy et a madame la roine et as signeurs par cui consel il estoiient la venut, quant
tant leur estoit que de li faire telle honneur que pour tel cose il avoiient si
souffissans gens a lui envoiiés. Et que moult volentiers s’acorderoit a leur requeste,
se nostres Sains Peres li papes et Sainte Eglise s’i acordoit.
Celle response leur souffi assés grandement. Puis envoiierent tantos deux de leurs chevaliers et II clers de droit pardeviers le Saint
Pere, a Avignon pour impetrer dispensation de celi mariage
acorder. Car sans le congiet dou Saint Pere faire ne se pooit pour le linage de Franche dont il estoiient moult prochain, si comme en tierch degret. Car leurs II meres estoiient cousines germaines, issues de II suers freres. Assés tos apriés chou qu’il furent venut a Avignon, il eurent faite lor besongne. Car li Sains Peres et li colleges s’i consentirent assés
benignement pour le haulte nobleche dont tout doi estoiient issut.
Quant chil message furent revenu de Avignon a Valenchiennes a toutes leurs bulles,11 chils mariages fu tantos ottriiés et affremés d’une part et d’aultre. Si fist on le devise pourveir et apparillier de tout che qu’il convenoit, si honnourablement comme a telle damoiselle, qui devoit estre roine d’Engleterre, afferoit. Quant apparilliet fu, si comme dit est, elle fu espousee par le virtut d’unne procuration apparans souffissanment, qui la fu aportee depar le roy d’Engleterre.10 Et puis si fu mise a le voye pour amener en Engleterre pardeviers sen marit, qui l’atendoit a Londres, la ou on le devoit couronner. Et monta en mer la ditte damoizelle Phelippe de Hainnau a Wissant. Et ariva et toute se compagnie a Douvres. Et la conduisi jusques a Londres chils gentils chevaliers messires Jehans de Hainnau, ses oncles, qui grandement fu recheus, honnourés et festiiés dou roy, de madame le roine se mere, des aultres dames, des barons et des chevaliers d’Engleterre.9 Si eut adont a Londres grant feste et grant nobleche des signeurs, contes, barons et chevaliers, des haultes dames et des nobles pucelles, de riches atours et de riches paremens, de jouster et de behourder pour l’amour de elles, de danser et de karoller, de grans et biaus mengiers chescun jour donnet. Et durerent ches festes par l’espasce de trois sepmainnes. Au chief de ches jours messires Jehans de Hainnau prist congiet et s’en parti, a toute se compagnie de Hainnau bien furnis de biauls jouiauls et riches que on leur avoit donnés d’un costet et d’aultre en pluiseurs lieus. Et demora li jovene roine Phelippe a petite compagnie de son paÿs, fors mis I jovene damoisiel que on nommoit Watelet de Manni, qui y demora pour servir et taillier devant li, li quels acquist puissedi si grant grasce au roy et a tous les signeurs et chevaliers dou paÿs qu’il fu dou secré et dou plus grant consel le roy au gret de tous les nobles dou paÿs. Et fist depuis si grandes proeches de sen corps en tant de lieus que on n’en puet savoir le nombre, si comme vous orés avant en l’istore se il est qui le vous diie.
¶ Or nous tairons nous de lui a parler tant c’a present et des Englés. Et retournerons as Eskochois.
SHF 1-40 syncApriés chou que li Escot se partirent par nuit de le montagne, la ou li jovenes rois Edouwars et li signeur d’Engleterre les avoiient assegiés, si comme vous avés oy, il alerent XXII lieuues de celui sauvage paÿs sans arester. Et passerent celle riviere de Thin assés priés de Carduel en Galles. Et a l’endemain il revinrent en leur paÿs. Et se departirent par l’ordenanche des signeurs et en rala cascuns en se maison. Assés tos aprés signeur et aulcun bon preudomme pourcachierent tant entre le roy d’Engleterre et sen consel et entre le roy d’Escoche que une triuwe fu acordee entre iauls a durer par l’espasce de trois ans. Dedens celle triuwe avint que li rois Robers d’Escoche, qui moult preus avoit estet, estoit devenus vielx et foibles et si quierkiés de le grosse maladiie, che disoit on, que morir le convint. Quant il senti et congneut que morir le convenoit sans retour, il manda tous les barons de sen roiaulme ens es quels il se fioit le plus, pardevant lui. Si leur dist que morir le convenoit, si comme il veoiient. Si leur priia moult affectueusement et leur quierka seür leur feaulté que il gardaissent pb 14 v