pb 12 vpasserent le riviere et aulqun a piet pour escarmuchier a iauls et ossi se desrouterent aulqun Escochois, qui couroiient et racouroiient escarmuchant li un al autre tant qu’il y eut des mors, des navrés et des prisonniers des uns as aultres. Ensi comme aprés miedi li signeur d’Engleterre firent a savoir que chescuns se retraisist a se loge. Car bien leur sambloit qu’il estoiient la pour nient. Si se retraist chescuns a son logeis. En cel estat furent il par trois jours et li Escot d’autre part seür leur montagne sans deppartir. Toutesfois tous les jours y avoit gens escarmuchans d’unne part et d’aultre et souvent des mors et des pris. Et toutes les viesprees a le nuit li Escot faisoiient par coustume si grans feus et tant et faisoiient si grant bruit de jupler et de corner tous a une voix qu’il sambloit proprement as Englés que che fust uns drois infiers et que tout li diable fuissent la assamblet par droit advis. Li intention des signeurs d’Engleterre estoit de tenir ches Escos la endroit comme assegiés puisqu’il ne se pooiient boinement a iauls combatre et les quidoiient bien affamer. Car nulle pourveanche ne leur pooit venir. Et si ne se pooiient de la partir, si qu’il cuidoiient, pour raler en leur paÿs. Et si savoiient bien li Englés par les priseniers qui pris estoiient, que li Escochois n’avoiient nulle pourveanche de pain, de vin ne de sel. Biestes avoiient il a grant plentet qu’il avoient prises ens ou paÿs, si en pooiient mengier en seuwe et en rost a leur plaisir sans pain et sans sel, a quoi il n’acomptoiient nient granment. Mais qu’il euissent I pau de farine dont il usent, ensi comme dit vous ay par deseure. Et ossi en usent bien aulcun Englés quant il sont en leurs chevaucies et il leur touche. Or avint que le quatrime jour au matin que li Englés avoient la estet logiet, il regarderent pardeviers le montagne as Escochois, si ne veirent nullui. Car il s’en estoiient partit a le mienuit, si en eurent li signeur grant merveille et ne pooiient apenser qu’il estoiient devenut. Si envoiierent tantos gens a cheval et a piet par ches montagnes, qui les trouverent entours heure de prime logiés seür une aultre montagne plus forte que celle devant n’estoit, seür celle riviere meismes. Et estoiient logiet en I bois pour estre plus repus et pour plus secretement aler et venir quant il vaulroiient. Sitos comme il furent trouvet, on fist les Englés deslogier et traire celle part tout ordonneement et s logier seür une aultre montagne droit a l’encontre d’iauls. Et fist on les batailles rengier et faire samblant que d’aler vers iauls. Mais sitretos qu’il veirent l’ordenanche as Englés et euls approchier, il issirent hors de leurs logeis et s’en vinrent rengier faitichement assés priés de le riviere contre iauls. Mais onques ne vaulrent deschendre ne venir vers les Englés. Et li Englés ne pooiient aler jusques a iauls qu’il ne fuissent tout mort ou tout perdu davantage ou pris a grant meschief. Si se logierent la endroit encontre iauls et demorerent XVIII jours tous plains seür celle seconde montagne et tous les jours rengiés encontre iauls. Si envoioiient li signeur d’Engleterre bien souvent leurs hiraus pardeviers iauls parlementer que il vausissent livrer plache et pieche de terre, u on leur liveroit. Mais oncques a nulles de ches parechons il ne se vaurent acorder. Si vous di bien pour veritet que li une hoost et li aultre en ches sejours eurent moult de mesaises.

Le premiere nuit que li Englés furent logiet seür celle seconde montagne a l’encontre des Escos, messires Guillaumes de Douglas, qui estoit moult preus et entreprendans et hardis chevaliers, prist entours le mienuit environ II cens armeures de fier et passa celle riviere bien lonch de leur hoost par quoi on ne s’en perchuist. Si se feri en l’oost des Englés moult vaillaument en criant: "Douglas! Douglas! vous y morrés tout, signeur baron englés." Et en tua ils et se compagnie plus de trois cens et frappa des esporons jusques proprement devant le tente dou roy toudis criant et huant: "Douglas! Douglas!" et copa II ou trois des cordes de le tente dou roy, puis s’en parti a tant. Bien puet estre qu’il perdi aulquns de ses gens a se retraitte. Mais che ne fu mie granment. Et retourna ariere deviers ses compagnons en le montagne, depuis n’y eut riens fait. Mais toutes les nuis li Englés faisoiient grans gais et fors, qui se doubtoiient dou resvillement des Escochois. Et avoiient mis gardes et escoutes en ciertains lieus par quoi, se cil sentesissent ne oissent riens, il le segnepb 13 r