pb 11 vsent par la ou assés priés rapasser pour retourner en leur paÿs. De quoi grant murmuration commencha entre les Englés. Car auqun voloiient en mettre as aultres qui avoiient donnet che consel de la venir en tel point que il avoient pour le roy trahir et toutes ses gens. Siques pour chou fu ordonnet entre les signeurs que on se mouveroit de la et rapasseroit on le ditte riviere VII lieuues par deseure, la ou elle estoit plus aisieule a passer. Et fist on criier que casquns se apparillast pour deslogier l’endemain et sieuuist les banieres. Et si fist on adont criier que, qui se vaulroit tant travillier qu’il peuist raporter certainnes nouvelles au roy la ou on poroit trouver les Escochois, li premiers qui che li aporteroit, il aroit C livrees de terre a hiretage a l’estrelin. Et le feroit li rois chevalier. Quant ches nouvelles furent esparses par l’ost, toutes gens en eurent grant joye. Adont se deppartirent del hoost aulqun chevalier et esquiier englés jusques a quinze ou XVI, pour le convoitise de gaegnier celle proumesse. Et passerent le riviere en grant peril et monterent seür les montagnes et puis si se deppartirent li uns cha et li aultres la et se mist chescuns a l’aventure par lui. L’endemain tous li hoos se desloga et chevaucherent che jour assés bellement. Car li cheval estoient foullet et mal livret et mal fieret et quoissiet as chaingles et seür le dos. Et firent tant qu’il rapasserent le riviere en grant malaise. Car elle estoit grosse pour le plouvage, par quoy il en y eut assés de bagniés et des Englés noiiés. Quant tout furent rapasset il se logierent la endroit. Car il trouverent fourages es prés et as camps pour le nuit passer dalés un petit village que li Escos avoiient ars a leur passer, si leur sambla droitement qu’il fussent arivet a Paris. L’endemain il se partirent de la et chevauchierent par montagnes et par vallees toute jour jusques priés de nonne que on trouva aulquns hamelés ars et aulqunnes petittes campagnes ou il y avoit bledz et prés. Siques toute li hos se loga la endroit celle nuit. Et le tierch jour chevauchierent il en tel maniere. Si ne savoiient li plus la ou on les menoit ne nulles nouvelles des Escochois. Et le quart jour ossi tout en tel maniere dusques a heure de tierche. Adont vint uns escuiers fortement chevauchant pardeviers le roi. Se li dist : "Sire, je vous aporte nouvelles. Li Escot sont a trois lieuues priés de chi logiet seür une montagne et vous attendent la. Et y ont bien esté ja VIII jours et ne savoiient nouvelles de vous nient plus que vous ne saviés nouvelles d’iauls, che vous fai jou ferme et vray. Car je me embati si priés d’euls que je fui pris et menés en leur host devant les signeurs pour prison. Si leur di nouvelles de vous, et comment vous les queriés pour combatre a iauls. Et tantos li signeur me quitterent me prison quant je leur euch dit que vous donriés C livrees de terre a l’estrelin a celi qui premiers vous raporteroit certainnes nouvelles d’iauls par telle condition que je leur juray et creantay que je n’aroiie repos jusques adont que je vous aroiie dit ches nouvelles. Et dient, che sachiés, que ossi grant desir ont il de combatre a vous conme vous avés a iauls. Et les trouverés la endroit sans faulte."

Tantos que li rois entendi ches nouvelles, il fist toute l’oost la endroit arester en uns bles pour leurs chevaus paistre et rechengler d’encoste une blanche abbeye, qui estoit toute arse, que on clamoit dou tamps le roy Artus le Blanche Lande. La endroit se confiesssa et adrecha chescuns a sen loyal pooir. Et fist la endroit li rois dire grant fuison de messes pour acumeniier chiauls qui devotion en aroiient. Et assigna tantos bien et souffissanment a l’escuiier les C livrees de terre que proumis avoit. Et le fist la endroit chevalier pardevant tous. Apriés, quant on fu I pau reposet et desjunet, on sonna le trompette; chescuns ala monter. Et fist on les banieres chevauchier ensi que chils nouviauls chevaliers les conduisoit. Et toudis chescunne bataille par lui sans desrouter par montagne ne par vallee. Mais toudis rengiés ensi que on pooit et que ordonnet estoit. Et tant chevauchierent en celi maniere que il vinrent entours miedi si priés des Escochois que il les veirent tout clerement. Et li Escot iauls ossi. Sitos comme li Escochois les veirent il issirent de leurs logeis tout a piet. Et ordonnerent trois bonnes batailles faitichement seür le devaler de le montagne, la ou il estoiient logiet. Par desoubs celle montagne couroit une riviere forte pb 12 r