pb 11 rle jour devant de avainne nulle ne de fourage. Et euls meismes ne gousterent tout le jour ne le nuit que chescuns sen pain qu’il avoit deriere li tourset, ensi que dit vous ay, qui estoit de le sueur dou cheval tous soulliés et ordés. Ne il ne burent d’aultre buvrage que de le riviere qui la couroit, horsmis aulquns signeurs qui avoiient boutelles, che leur porta grant confort. Et n’eurent toute le nuit ne feu ne lumiere, et ne le savoiient de quoy faire, horsmis aulquns signeurs qui avoient tortis aportés seür leurs sommiers. Ensi comme vous oés et a teil meschief passerent il le nuit, sans roster selles a leurs chevaus ne iauls desarmer. Et quant li desirés jour fu venus en quoi il esperoiient a avoir auqun confort et aulqunne adresche pour iauls et pour leurs chevaus aisier, pour mengier et pour logier ou pour combatre as Escochois que il desiroiient si pour le desir qu’il avoiient de issir de celle mesaise et povretet la ou il estoiient. Adont commencha a plouvoir et pleut toute le journee si onniement et si fort que anchois nonne passee le riviere seür le quelle il estoiient logiet, devint si grant que nuls ne le peuist passer, par quoi nuls ne peut envoiier pour veir ne savoir la ou il estoiient cheu. Ne ou il poroiient recouvrer de fourage ne de littiere pour leurs chevaus, ne pain, ne vin, ne aultre cose pour euls soustenir. Si les convint juner tout le jour ensi comme la nuit. Et les chevaus mengier terre par le wason ou bruiere et fueilles d’arbres. Et copper planchons de bois a leurs espees et leurs baselaires tous ploians pour leurs chevaus loiier. Et verghes pour faire hutteletes pour iauls muchier. Entours nonne aulqun povre dou paÿs furent trouvet, si leur fu demandet la ou il estoiient cheu et embatut. Chil respondirent qu’il estoiient a XIIII lieuues englesces priés dou Noefchastiel seür Thin. Et a onze lieuues priés de Carduel en Galles et si n’avoit nulle ville plus priés de la ou on peuist riens trouver pour euls aisier. Tout che fu nonchiet au roy et as signeurs. Et envoiia cascuns tantos ses messages celle part et ses petis chevaus et ses sommiers pour aporter pourveanches. Et fist on savoir depar le roy a le ville dou Noefcastiel que qui vaulroit gaegnier, si amenast pain, vin, avainne et aultres denrees, on li paiieroit tout seck. Et le feroit on conduire a saufconduit jusques al hoost. Et leur fist on savoir que on ne se partiroit de la entour dusques adont que on saroit que li Escot estoiient devenut.

A l’endemain entour heure de nonne revinrent li message que li signeur et li aultre compagnon avoiient envoiet as pourveanches. Et en raporterent che qu’il peurent pour iauls et leurs maisnies, granment ne fu che mies. Et avecques euls vinrent gens pour gaegnier, qui amenoiient seür petis chevalés et petis mulés pain mal quit en paniers, povre vin en grans barils et aultres denrees a vendre, dont moult de gens et grant partiie del hoost furent durement apaisiés. Et ensi de jour en jour tant qu’il sejournerent la entours VIII jours seür celle riviere entre ches montagnes en attendant casqun jour le seurvenue des Escochois, qui ossi ne savoiient que li Englés estoiient devenut, nient plus que li Englés savoiient d’iauls. Ensi furent il trois jours et trois nuis sans pain, sans vin, sans candelles, sans avainne, et sans fourage ne aultres pourveanches. Et apriés par l’espasce de quatre jours qu’il leur convenoit accater I pain mal quit VI estrelins qui ne deuist valoir c’un parisis, et I pot de vin XXIIII estrelins, qui n’en deuist valoir que VI. Encores y avoit on si grant rage de famine que li uns le tauloit hors des mains de l’autre. Dont pluiseur hustin et grant debat vinrent des compagnons, des uns as aultres. Encores avecques tous ches meschiés il ne ciessa nient de plouvoir toute celle sepmainne, par quoy leurs selles, penniaus, contrechaingles furent tout pouri. Et tout li cheval, ou li plus grant partiie, quassés seür le dos, et ne savoiient de quoi chiauls ferrer qui estoiient defferret, ne de quoi couvrir fors que de leurs tournikiaus d’armes. Et ossi n’avoiient li plus grant partiie que viestir ne de quoi couvrir pour pleuve plueve ne pour le froit, fors que de leurs auquetons et de leurs armeures. Et n’avoiient de quoi faire feu fors que de verde laigne, qui ne puet durer encontre le plueve.

A tel meschief, mesaise et povretet demorerent il entre ches montagnes et le dicte riviere toute celle sepmainne, sans oyr ne savoir nouvelles des Escochois qu’i quidoient qu’il deuispb 11 v