pb 96 rCharles lui en donnoit et devoit donner VC livres de terre hereditablement. Ce jour vint, si furent les portes ouvertes a messire Charles a l’heure de menuit, siques lui et ses gens entrerent en la ville de Jugon a grant puissance de gens arméz, a celle mesme heure. Dont la guette du chastel s’en apparceut. Si commença a crier "A l’arme! Trahy! Trahy!" Les bourgois, qui de ce ne se donnoient garde, se commencerent a esmouvoir, et quant il virent leur ville perdue, ilz se mistrent a fouir devers le chastel par tropeaulx. Et ce bourgois qui trahis les avoit se mist a fouir par couverture avecques eulx.

¶ Quant le jour fut venu, messire Charles et ses gens entrerent es maisons des bourgois pour eulx hebergier, et y pristrent tout ce qu’ilz y trouverent. Quant messire Charles vit le chastel si fort et si emply de bourgois, il dist qu’il ne se partiroit de la jusques adoncques qu’il auroit mis le chastel a sa voulenté. Le chastellain et les bourgois apparceurent tantost que ce bourgois les avoit trahis. Si le pristrent et pendirent tantost aux creneaux et aux murs du chastel de la tour. Et pour ce ne se partirent mie messire Charles de Blois ne ses gens, mais s’ordonnerent et appareillerent fortement et durement. Quant ceulx qui dedens le chastel se tenoient virent que messire Charles ne s’en partiroit point ainsi jusques adoncques qu’il auroit le chastel, ainsi qu’il avoit dit, et bien sentoient qu’ilz n’auroient mie pourveances asséz pour eulx tenir plus hault de dix jours, ilz s’accorderent a ce qu’ilz se rendroient. Si commencerent a traittier, et se porta le traittié entr’eulx tel qu’il se rendroient quittement et purement a messire Charles, saufs leurs corps et leurs biens qui demouréz leur estoient. Et firent feaulté et hommage au dit messire Charles de Blois, et le recognurent a seigneur, et devindrent tous ses hommes.

¶ Ainsi ot le dit messire Charles de Blois le fort chastel et la bonne ville de Jougon, et en fist une bonne garnison en laquelle il laissa messire Girart de Rochefort a cappitaine, et les refreschit d’autres gens d’armes et de pourveances.

¶ De ces nouvelles fut la contesse de Montfort et tous ceulx de sa partie courrouciéz, mais amender ne le peurent.

¶ Endementres que ces choses advindrent, s’essoingnerent aucuns preudommes de Bretaigne de parlementer unes trieves entre le dit messire Charles et la contesse, la quelle s’i accorda legierement. Et aussi firent tous ses aidans, car le roy d’Angleterre leur avoit ainsi mandé par les messagiers que la contesse et messire Gautier de Manny y avoient envoyéz. Et tantost que les dites trieves furent accordees, la contesse se mist en mer en entention de arriver en Angleterre, ainsi qu’elle fist, pour parler au roy anglois et lui monstrer toutes ses besoingnes.

¶ Or me tairay a tant de la contesse de Montfort et parleray du roy Edouart d’Angleterre.

Vous avéz bien entendu en l’istoire ça devant comment le roy d’Angleterre avoit guerres en plusieurs lieux et marches, et avoit par tout ses garnisons et gens d’armes a grans fraiz et a grans coutanges, c’est assavoir en Picardie, en Normandie, en Gascoingne, en Xantonge, en Poitou, pb 96 v