pb 65 rennemis. Siques toutes manieres de gens d’armes d’onneur qui se desiroient a avancier et a acquerre grace par fait d’armes se traioient celle part, tant d’un léz comme de l’autre.

¶ Or advint que trois chevaliers allemans, qui se tenoient en la garnison de Bouhain, furent informéz que les deuz roys s’approchoient durement, et que on supposoit bien qu’ilz se combatroient. De quoy les deux prierent tant a leurs compaignons, qu’ilz s’accorderent ad ce qu’il demourroit, et les autres yroient devant Tournay querre les adventures, et garderoient la forteresse bien et souffisamment jusques a leur retour. Si se partirent les deux chevalliers, dont on clamoit l’un messire Courart de Lansemich et chevaucherent tant qu’ilz vindrent vers Estampons dessus Valenciennes, car ilz vouloient passer l’Escault a Condet. Si ouyrent, entre Fresne et Estampons, grant effroy de gens, et en virent pluseurs fuians. Donc brocherent ilz leurs chevaulx des esperons et leur route celle part, et pouoient estre environ XXV lances. Si encontrerent les premiers qui s’en fuioient, et leur demanderent qu’il leur failloit ne qu’il leur estoit advenu. "En nom de Dieu seigneurs," ce respondirent les fuians, "les souldoiers de Mortaigne sont yssus et ont cueilly grant proie cy entour, et l’en meinnent devers leur forteresse, et avecques ce pluseurs prisonniers de ce païs." Dont respondirent les chevaliers allemans: "Et nous sauréz vous mener celle part ou ilz vont?". "En nom de Dieu, seigneurs, ouy." Adoncques se sont mis les Allemans en chace aprés les François de Mortaigne, et suivirent les bons hommes qui les admenerent parmy les bois. Et adevancerent les dessus diz François, qui estoient VIXX soudoiers, qui emmenoient devant eulx deux cens grosses bestes et aucuns prisonniers paysans du bois, et estoit leur cappitaine, depar le seigneur de Beaugeu, ung chevalier de Bourgoingne qui s’appelloit messire Jehan Frelais. Sitost que les Allemans les virent, ilz les escrierent fierement et se bouterent de grant randon entr’eulx: et la ot ung bon hustin et dur, car le chevalier bourgoingnon se mist en deffense bien et hardiement, et les aucuns de sa route et non pas tous, car il y ot pluseurs bidaux mors. Et s’en fouyrent, mais ilz furent de si préz chaciéz des Allemans et des villains du païs, qui les suivoient aux plançons et aux bourles, que pou en eschapperent qui ne feussent mors et arrestéz. Et y furent messire Jehan de Frelais pris et toute sa compaignie, et la proie rescousse et rendue aux hommes du païs, qui grant gre en sceurent aux Allemans. Depuis ceste adventure s’en revindrent les chevaliers devant Tournay, ou ilz furent bien venus.

Asséz tost aprés que le roy de France s’en fut venus logier a ost au pont a Bovines, si se mist une compaignie de Hannuyers sus par l’ennortement de messire Waflart de la Croix, qui leur dist qu’il congnoissoit tout le païs et qu’il les amenroit en tel lieu sur l’ost du roy de France ou ilz gaingneroient grandement. Si se partirent a son ennortement, et pour pb 65 v