pb 64 vfemmes, et passerent parmy l’ost au duc de Braibant, qui leur fist grace, car il les fist conduire tout oultre l’ost sauvement. Le roy anglois entendit bien par ceulx et autres que la cité estoit durement estrainte. Si en fut joyeux et pensa bien qu’il la conquerroit, com longuement ne quelz fraiz il y meist.

¶ D’autre part le roy de France, qui se tenoit a Arras et estoit toute la saison tenu, entendi que ceulx de Tournay estoient durement contrains, et qu’ilz avoient grant mestier d’estre confortéz. Si ordonna a ce qu’il les conforteroit a quelque meschief que ce feust, car il ne vouloit mie perdre une telle cité que Tournay estoit. Si fist ung tresgrant mandement par tout son royaume, et aussi une grant partie dedens l’Empire, tant qu’il ot le roy Charles de Behaigne, le duc de Lorraine, le conte de Bar, l’evesque de Mez, l’evesque de Verdun, le conte de Montbeliart, messire Jehan de Chalon, le conte de Geneve et aussi le conte de Savoie son frere. Tous ces seigneurs vindrent servir le roy de France ad ce qu’ilz peurent avoir de gens.

¶ D’autre part revindrent le duc de Bretaigne, le duc de Bourgoingne, le duc de Bourbon, le conte d’Alençon, le conte de Forestz, le conte d’Armagnach, le conte de Flandres, le conte de Blois, messire Charles de Blois, le conte de Harecourt, le conte de Dampmartin, le sire de Coucy et si grant foison de barons et de signeurs que les nommer par noms et par seurnoms ce seroit ung grant detriement.

¶ Aprés le roy de Navarre revint, atout grant foison de gens d’armes de Navarre et de la terre qu’il tenoit en France, dont il estoit homme du roy. Et si y estoit le roy David d’Escoce a la delivrance du roy de France a belle route de gens d’armes.

Quant tous ces seigneurs dessus nomméz furent venus a Arras devers le roy, il ot conseil de chevauchier et de traire vers ses ennemis. Si s’esmust, et chascun le suivy ainsi que ordonné estoit. Et firent tant par leurs petites journees qu’ilz vindrent a une petite riviere qui est a trois lieues pres de Tournay, la quelle est moult parfonde et environnee de si grans maréz que on ne la pourroit passer, si non par ung petit chemin si estroit que un seul homme a cheval seroit asséz essonnié a passer oultre, deux hommes ne s’i pourroient contourner. Et loga trestost l’ost sur les champs, sans passer la riviere, car ilz ne peussent l’andemain passer, ains demourerent les deux osts tous quoys. Les seigneurs qui la estoient deléz le roy de France orent conseil comment ilz peussent faire pont pour passer la riviere et les crolieres plus aise et plus seurement. Si furent envoiéz aucuns chevaliers et ouvriers pour regarder le passage, mais quant ilz orent tout consideré et advisé, ilz regarderent qu’ilz perdoient leur temps. Si rapporterent au roy qui n’y avoit point de passage, fors par le Pont a Crecy tant seullement. Si demoura la chose en cel estat, et se logerent les seigneurs, chascun seigneur par lui entre ses gens.

¶ Les nouvelles s’espandirent partout que le roy de France estoit logiéz au Pont a Crecy et entre le Pont et Bouvines, en entente de combatre ses pb 65 r