¶ Ceste response souffit adoncques asséz a ces seigneurs d’Angleterre, puis s’en retournerent a grant joie. Souvent envoierent leurs messages devers le roy leur seigneur en lui signifiant comment ilz avoient besoingne, et le roy leur envoioit grant or et grant argent pour paier leurs fraiz et pour departir a ces seigneurs d’Alemaigne, qui autre chose ne convoictoient.
¶ En ce temps trespassa le gentil conte Guillaume de Haynault, le VIIe jour du mois de juing, l’an de Grace mil CCC XXXVIII. Et fut enseveliz aux Cordeliers a Valenciennes. Et chanta et celebra l’obseque l’evesque Guillaume de Cambray. La ot grant foison de ducs, de contes et de barons, bien fut raison, car il estoit renomméz et améz de tous.
¶ Aprés son trespassement, se trayst a la conté de Haynault, de Zellande et de Hollande messire Guillaume son filz, qui ot a femme la fille au duc de Braibant appellee Jehanne de Braibant, et fut douee de la terre de Bruch, qui est moult bel hiretage et moult proffitable. Et madame Jehanne de Valois sa mere s’en vint demourer a Fontenelles sur Escaut, et la usa sa vie comme bonne et devote en l’abbaie, et y fist moult de biens.
SHF 1-61 syncDe toutes ces devises et ordonnances, ainsi comme elles se portoient, et des confors et aliances que le roy anglois acqueroit pardeça la mer, estoit le roy Phelippe tout informéz. Et eust attrait ces gens a son accord. Mais ce Jaquemart d’Artevelle avoit ja si surmontees toutes manieres de gens en Flandres que nul n’osoit contredire a son oppinion. Mesmement le conte, leur seigneur, n’osoit clerement monstrer ne tenir en Flandres, ains avoit envoiee sa femme et ses enfans en France, pour doubte des Flamens. Avecques tout ce, se tenoient en l’isle de Cagent aucuns chevaliers et escuiers de Flandres en garnison, dont messire Dutres de Halloym et messire Jehan de Rodas et les enfans de Lestrief estoient cappitaines, et la gardoient le passage contre les Anglois et faisoient guerre couvertement: dont les chevaliers d’Angleterre, qui se tenoient en Haynault, estoient tous informéz que, s’ilz s’en raloient par la en leur païs, ilz seroient rencontréz, par quoy ilz n’estoient pas bien asseurs. Ce nonobstant, ilz aloient et chevauchoient par le païs de Flandres es bonnes villes, mais ce estoit sur le confort de Jaquemart d’Artevelle, qu’il les portoit et honnouroit en toutes les manieres que il pouoit.
¶ Or retournerons un petit au duc de Braibant.
SHF 1-62 sync De l’excusation que le duc de Braibant fist pardevers le roy de France et la maniere comment.Quant le duc de Braibant ot faites ses couvenances que vous
avéz ouyes aux Anglois, il s’avisa que le roy de France lui
avoit autrefois esté contraire. Si se doubta qu’il ne se feust infourméz contre durement contre lui et, s’il avenoit que l’entreprinse du roy d’Angleterre ne venist a bon port, que le roy de France ne le
voulsist guerroier, et lui feist comparer ce que les autres avoient accordé. Si envoia de son conseil devers le roy de France messire Loÿs d’Atrenehen, sage chevalier durement, et pluseurs autres de son conseil pour lui excuser et dire au roy qu’il ne voulsist croire pb 34 r