pb 2 vdu roy son pere et de la royne sa mere. Certaine chose est que l’oppinion des Anglois communement est telle, et l’a on veü avenir en Angleterre puis le temps du gentil roy Artus, que entre deux vaillans roys a tousjours eu ung moins souffisant de sens et de proesce. Asséz apparant est par le roy Edouart dont je parloie maintenant, car voirs est que son aieul, que on appela le bon roy Edouart, fut moult vaillant, sages et hardis preudomme, et entreprenant et bien fortuné en faiz de guerres, et ot moult a faire contre les Escocs et les conquist trois fois ou quatre, et ne peurent oncques les Escocs avoir duree ne victoire contre lui. Et quant il fut trespassé, son filz de son premier mariage, qui fut pere au gentil roy Edoart, fut couronnéz aprés lui, qui point ne lui ressembla de sens ne de proesce. Ainçois gouverna et maintint son royaume sauvagement pour le conseil d’autrui, dont puis il lui meschey laidement, si comme vous pourréz oyr cy aprés s’il vous plaist. Car asséz tost aprés ce qu’il fut couronnéz, le roy Robert de Breux, qui estoit roy d’Escoce, qui avoit tant et si souvent donné a faire au bon roy Eduart dessus dit, que on tenoit pour moult preux, reconquist toute Escoce et la bonne cité de Bervich avec, et ardit et gasta grant partie du royaume d’Angleterre, quatre journees ou cinq dedens le paÿs par deux fois. Et desconfist cellui roy et tous les barons d’Angleterre en ung lieu d’Escoce que on dit Estrumelin, par bataille rengee et arestee. Et dura la chace de ceste desconfiture par deux jours et par deux nuitz, et s’en affouy le roy a moult pou de ses gens jusques a Londres. Mais pour ce que ce n’est mie de nostre matiere je me tairay a tant.
SHF 1A-2 sync Pour quelle achoison la guerre meut entre le roy de France et le roy d’Angleterre.Le roy qui fut pere a ce gentil roy Edouart, avoit deux freres de remariage, desquelz l’un estoit appellé le conte Mareschaux et estoit de moult sauvage et diverse maniere, l’autre avoit nom messire Ayméz et estoit conte de Kent. Moult estoit cesti preudomme, doulx et debonnaire, et bien améz de bonnes gens. Ce roy estoit marié a la fille du beau roy Phelippe de France,
qui estoit une des plus belle dame du monde. Il ot de ceste dame deux filz et deux filles, desquelz
le premier est le gentil et le preux roy Edouart d’Angleterre de qui ceste histoire est commence. L’autre ot
nom Jehan d’Altem et morut asséz jeune. L’ainsnee de deux filles ot nom Ysabel et fut
mariee au jeune roy David d’Escosse filz du roy Robert de
Breux, et lui fut donnee en mariage en jeunesse par l’accord des deux roys et royaumes d’Angleterre et d’Escoce et par paix
faisant. L’autre fille fut mariee au conte Regnault de Guerles, et ot de ceste dame deux filz, Regnault et Edouart, qui depuis regnerent en grant
puissance contre leurs ennemis.
SHF 1A-3 sync
Or dit le compte que ce beau roy Phelippe de France ot trois filz avec celle belle fille Ysabel,
qui fut mariee au roy d’Angleterre dont je vous ai parlé cy dessus. Et furent ces trois filz moult beaulx, desquelz l’ainsné ot nom Loÿs qui fut, au
vivant de son pere, roy de Navarre et l’appelloit on le roy Hustin. Le second ot nom Phelippe le Long et le tiers ot nom Charles. Et furent tous trois roys de France aprés la mort du roy Phelippe leur pere, par droitte succession l’un aprés l’autre pb 3 r