Quant monseigneur Agos des Baus senti que ceulx de la Riole se vouloient rendre, il ne voult oncques estre a leur traittié, mais se parti d’eulx et se bouta dedens le chastel de la Riole avecque les compaignons qu’il avoit, et y fist mettre et mener, endementres que ce traittié se faisoit, grant quantité de vins et de pourveances de la ville. Et puis se clostrent leans et disrent qu’il ne se rendroient mie ainsi. Or vindrent les dessus dis chevaliers au conte d’Erby, et lui disrent comment les bourgois de la Riole se vouloient rendre, saufz leurs corps et leurs biens. Le conte demanda se le capitaine avoit esté a ces traictiéz. Ilz respondirent que nennil, fors tant seulement les hommes de la ville. "Or aléz veoir", dist le conte aux chevaliers, "pourquoy il n’y est, et comment il se veult maintenir." Ilz distrent: "Sire, voulentiers." Lors retournerent arriere jusques aux barrieres et demanderent a ceulx de la ville " Le capitaine ou est?" "Il ne veult il point estre en vostre traittié?" Ilz respondirent "Nous ne parlons que de nous meismes. Il fera a sa voulenté. Ja s’est il boutté ou chastel et monstré qu’il le veult tenir contre vous." Adont retournerent les chevaliers au conte d’Erby et lui relaterent la besoingne ainsi qu’elle avoit aloit. Quant le conte oÿ ce, si n’en fut mie moins pensif. Et quant il ot pensé une espace, si dist: "Aléz aléz, prenés les a mercy, parmy tant qu’ilz viengnent sur les champs apporter les clefz. Car par la ville prendrons nous le chastel." Lors se departirent les dessus dis dis du dit conte et vindrent derechief a ceulx de la Riole et les receurent a mercy, parmy tant qu’ilz vindrent sur les champs apporter les chefz de la ville au conte d’Erby. Et lui representerent en disant: "Chiers sires et honnouréz, de ce jour en avant nos nous recongnoisons a estre voz feaulx sires subgiéz et nous mettons du tout en l’obeissance du roy d’Engleterre." Ainsi devindrent hommes du roy d’Engleterre ceulx de la Riole. Avec tout ce, le conte d’Erby leur fist jurer sur la teste qu’ilz ne conforteroient en riens ceulx du chastel de la Riole, mais leur seroient ennemis de tout leur pouoir. Ilz lui jurerent solennelment et par ainsi vindrent ilz a paiz. Et fist deffendre le conte sur la hart que nul ne fist mal a ceulx de la Riole.

Ainsi ot le conte d’Erby la ville de la Riole, mais le chastel se tenoit encores, qui bien estoit pourveu et garny de bonnes gens et de bon capitaine et seür, et de grant artillerie. Si se traist le dit conte dedens la ville et y fist traire toutes ses gens et environner le chastel et drecier pardevant tous les engins. IIII nuit et jour jettoient contre les murs du dit chastel mais petit l’empiroient. Car les murs estoient hault malement et de pierre moult dure, et ouvree jadis par mains de Sarrasins, qui faisoient leurs souldures si fortes et les ouvrages si estranges que ce n’est point de comparaison a ceulx de maintenant. Quant le conte d’Erby et messire Gaultier de Manny virent qu’ilz perdoient leur temps par ces engins, si les firent cesser, et s’aviserent qu’ilz ouvreroient d’un autre mestier. Ilz avoient des mineurs, car oncques ne furent sans pb 117 r