pb 115 vque ceste ordonnance voise ainsi, mais prenéz bons pleges qu’ilz ne se puissent de riens enforcier ce terme durant. Et s’il nous besoingne vivres pour nous rasfreschir et noz gens, nous en ayons sans dangier pour noz deniers." "Sire," dist il, "c’est bien l’entencion de moy." Adont se parti le sire de Manny du conte d’Erby et chevaucha jusques aux bailles de la ville ou le chevalier estoit qui l’atendoit. Si lui demoustra toutes les raisons dessus dittes. Il les recorda arriere a ceulx de la ville, qui n’estoient mie presens. Ceulx de Montsegur y descendirent voulentiers, et se mistrent tantost XII bourgois des plus souffisans en hostagerie pour acomplir les convenances et demourer la ville en paix. Ceulx furent envoiéz a Bourdeaulx. Ainsi demoura Monsegueur en composicion, et fust l’ost refreschi des pourveances de la ville. Mais point n’entrerent les Anglois dedens mais passerent oultre en courant et exillant le païs, si le trouverent plain et dru et grosses villes basties ou ilz recouvroient de tous vivres a grant foison.

Tant exploita l’ost au conte d’Erby qu’il vint asséz pres de Aguillon. Ad ce donc il avoit bon chastelain qui n’estoit mie trop vaillant homme d’armes, si comme il le monstra. Car si tost qu’il sçot que le conte d’Erby approuchoit, il fut si effree et ot si grant doubte de perdre corps et biens qu’il ne se fist point assaillir, mais vint au devant du conte et se rendi saufz ses biens et ceulx de la ville et du chastel, qui estoit bien de fors du monde et le moins prenable. De quoy ceulx du paÿs d’environ estoient moult esmerveilliéz quant ilz oyrent les nouvelles, especialment ceulx de la cité de Tholouse, c’est a VII lieues pres. Et depuis, quant l’escuier qui Aguillon avoit rendu vint a Tholouse, les hommes de la ville le prinsrent et lui misrent sus traison et le pendirent sans mercy.

¶ Quant le conte d’Erby ot la saisine de la ville et du chastel d’Aguillon, il en fut sy resjoy qu’il n’eust mie esté aussi lié se le roy d’Angleterre eust d’autre part conquis cent mile florins, pour la cause qu’il le veoit bien seant et en bonne marche, en la pointe de deux grosses rivieres portans navire. Et se refreschi et repara de tout ce qu’il besoingnoit ainsi que pour avoir y son retour et faire en son garde corps. Et quant il se parti il le laissa en la garde d’un bon chevalier et sage et vaillant qui s’appelloit monseigneur Jehan de Gombry. Puis chevaucha oultre le dit conte, a tout son ost, et vint a un chastel que en appelloit Segrat. Si le conquist par assault, et furent tous mors les souldoiers estranges qui dedens estoient. Et de la endroit ilz s’en vindrent devant la ville de la Riolle.

Or vint le conte d’Erby devant la Riole a toutes ses gens, et l’assega forment et destroitement de tous costéz. Et mist bastides sur les chemins en tele maniere que nulles pourveances ne pouoient venir ne entre dedens la ville, ne ou chastel. Et du chastel de la Riole estoit capitaine pour le temps un chevalier de Prouvence qui se nommoit monseigneur Agos des Baus, et avoit desoubz et en sa charge pluseurs bons compaignons qui la ville tindrent souffisaument. Si vous dis qu’il y ot pluseurs grans assaulx, car presque tous les jours pb 116 r