pb 6 vte du roy de France ou il trouva le duc de Normandie, adoncques personnellement a tout grant foyson d’autres seigneurs. Le sire de Maubuisson salua le roy, le duc et tous les seigneurs et relata son messaige bien et deuement. Quant il fut ouy et entendu on lui respondi moult briefment et dist on: "Vous dirés depar nous a cellui qui cy vous envoye que en cel estat que nous avons ja tenu le conte jusques a ore, nous le tenrons de ça en avant et lui ferons engaigier toute sa terre, et ainsi sera il guerroyéz de tous coustéz. Et quant bon nous semblera nous entrerons en Haynault si a point que nous parardrons le paÿs."

¶ Ces parolles ne plus ne moins rapporta le sire de Maubuisson a messire Jehan de Haynault, qui l’attendoit sur la riviere, lequel lui en rendy moult grant mercys.

¶ Lors s’en retourna arriere au logeis du conte de Haynault, son nepveu, et le trouva qu’il jouoit aux eschiecs au conte de Namur. Lequel se leva si tost qu’il vit son oncle, et lui demanda nouvelles. "Sire," dist il, "ad ce que je puis veoir le roy de France et son conseil prennent grant plaisir en ce que vous sejournéz cy a grans fraiz et dient qu’ilz vous feront despendre et engaigier vostre terre. Et quant bon leur semblera, ilz vous combatront et non pas a vostre voulenté ne a vostre ayse mais a la leur."

¶ De ces responces fut le conte de Haynault tout courrouciéz et dist qu’il n’yroit mye ainsi.

Nous nous tairons un petit a parler du duc de Normandie et du conte de Haynault et parlerons du roy angloys, qui s’estoit mis sur la mer pour venir et arriver en Flandres et de la venir en Haynault pour aydier au conte, son serourge, pour guerroyer contre les Françoys.

¶ Ce fut le jour devant la vegille saint Jehan Baptiste, l’an mil IIIC et XL, qu’il nagoit par mer a belle charge de vaisseaux et estoit toute sa navie partie du havre de Tamise et s’en venoit droittement pour arriver a l’Escluse.

¶ Adoncques estoyent entre Branquebarge et l’Escluse sur la mer, messire Hue Kierés, messire Pierre Bahues et Barbenoire a plus de VIIXX gros vaisseaulx sans les hosquebos, et estoyent bien tant de Normans, de Picars, de Bretons comme de Gennevoys jusques a XLM, et la estoyent ancréz et arrestéz au commandement du roy de France pour attendre la revenue du roy d’Angleterre. Car bien sçavoyent qu’ilz devoyent par la rapasser.

¶ Si lui vouloyent deffendre le passaige, comme ilz firent bien et hardiement, tant comme ilz pourent comme vous orrés recorder.

Le roy d’Angleterre et les siens qui s’en venoyent singlant regarderent et virent devers l’Escluse si grant foyson de vaisseaulx que des malx ce sembloit droittement un boys. Si en fut durement espb