pb 93 v (vol. 1)le roy trestout confuz et esbay. Et s’en ala atout son ost aprés les Escocs, et puis les suivi jusques oultre la bonne cité de Bervich, et se loga a IIII lieues pres de la cité de Gedours, la ou le roy David et toutes ses gens estoient entréz, pour les grans forteresces qu’il y a. La endroit demoura le dit roy anglois par l’espace de trois jours, pour savoir se les Escocs vouldroient yssir hors pour combatre a lui. Et sachiéz que tous les trois jours y avoit tant d’escarmouches et de palleteis entre les deux osts que on estoit ennuyéz de regarder; et souvent y avoit des mors et des pris d’une part et d’autre. Et sur tous les autres y estoit souvent veü en bon convenant monseigneur Guillaume de Douglas, qui s’armoit d’asur a comble d’argent et dedens le comble trois estoilles de gueulles. Et estoit cellui qui faisoit plus de beaulx faiz et de belles rescouses et de haultes entreprises, et fist en l’ost des Anglois moult de destourbiers.

En ces trois jours, parlementerent aucuns preudommes de trieves et accord entre ces II roys. Et tant traittierent que une trieve fut accordee a durer deux ans, voire se roy Phelippe de France s’i assentoit, car le roy d’Escoce estoit si fort aliéz a lui qu’il ne pouoit donner trieves ne faire paix sans lui. Et se le roy Phelippe ne s’i vouloit accorder, si devoient les trieves durer entre Escoce et Angleterre jusques au premier jour d’aoust. Et devoit estre quitte le conte de Moret de sa prison, se le roy d’Escoce pouoit tant pourchacier au roy de France que le conte de Salebrin feust quitte aussi de sa prison. La quelle chose devoit estre pourchacee dedens la feste saint Jehan Baptiste. Le roy anglois s’i accorda a celle trieve, plus legierement pour tant que cil fait grant sens, qui a trois guerres ou IIII, s’il en pouoit apaisier ou atrivier les deux ou trois qu’il le face. Et ce roy avoit bien apensé sur telz choses, car il avoit guerre en France, en Gascongne, en Poitou, en Xantonge et en Bretaigne, et partout estoient ses gens et ses souldoiers. Celle trieve fut ainsi accordee et affermee, comme vous avéz oy. Si departi le roy d’Escoce ses gens, et s’en rala chascun en sa contree. Puis envoia grans messaiges au roy Phelippe de France pour accorder ce que traictié estoit, s’il lui plaisoit. Il plut asséz bien au roy de France pour mieulx complaire au roy d’Escoce, et ne desdeist de riens au traittié, ains envoia tantost le conte de Salebrin en Angleterre. Dont si trestost qu’il y fut venu, le roy anglois renvoia arriere le conte de Moret en Escoce, devers le roy David, qui moult en ot grant joye. Ainsi fut fait ce change de ces deux seigneurs, comme vous avéz oy. Et se departirent ces deux grosses chevauchees sans autre chose faire, et se retraïst chascun en son lieu.

¶ Or retournerons a pb 94 r (vol. 1)