pb 90 r (vol. 1)y estoit affouy. Si penoient d’assaillir chascun jour plus aigrement, et faisoit le dit roy faire instrumens et engins pour venir assaillir jusques aux murs.

¶ Quant ilz se furent departis de devant le Neufchastel, messire Jehan de Neufville, chastellain pour le temps et souverain de Neufchastel, se party de nuit monté sur fleur de coursier, et esloingna les Escoz, car bien sçavoit les adresses et les refuites du païs pour tant qu’il en estoit. Et tant fist que dedens V jours il vint a Carchesee, ou le roy anglois estoit. Adoncques lui compta comment le roy d’Escoce a grant puissance estoit entréz en son païs, et ardoit et exilloit tout devant lui, et l’avoit laissié devant la cité de Dureme.

¶ De ces nouvelles fut le roy anglois moult courroucié. Si mist tantost messagiers en euvre et les envoia partout et manda a tous chevalliers et escuiers et autres gens dont on se pouoit aidier, dessus l’aage de XV ans et dessoubz de LX ans, que nul ne s’excusast, tantost ces lettres veues et ses mandemens oys, de venir devers lui sur les marches de North pour aidier a deffendre son royaume que les Escoz destruisoient. Adoncques s’avancerent contes, barons, chevalliers et escuiers et communaulté des bonnes villes, et se hasterent durement pour obeir au mandement du roy leur seigneur, et se mistrent tous a voie et de grant voulenté pardevers Evruich. Et mesmement le roy se parti premierement et n’antendy nulli, tant avoit grant haste, mais tousjours lui croissoient gens et venoient de tous costéz. Endementres que ce roy anglois se traioit devers la cité de Evruich et que chascun qui mieulx pouoit le suivoit, le roy d’Escoce fist forment assaillir la cité de Duremes par instrumens et engins qu’il avoit fait faire, que ceulx de la cité ne se porent garentir qu’elle ne feust prise a force et pillee, robee et arse, et toutes manieres de gens mis a mort sans mercy, hommes et fammes, prestres, moynes et chanoines et petis enffans qui estoient fouys a la grant eglise, car le feu y fut bouté, de quoy ce fut horrible pitié. Car en la cité de Duremes ne demoura oncques homme ne femme, ne petit enfant, ne maison, ne esglise que tout ne feust mis a destruccion, dont ce fut grant pitié et cruelle forsenerie, et est, quant on destruit ainsi crestianté et les eglises ou Dieu est servi et honnouré nuit et jour.

Quant ce fut advenu le roy David d’Escoce ot conseil qu’il se retraieroit arriere selon la riviere de Thim, et traieroit pardevers la riviere de Cardouel, qui est a l’entree de Galles. Ainsi qu’il aloit celle part, il se loga celle nuit et tout son ost asséz pres d’un moult fort chastel que on claime Salebrin, lequel fut pris avecques le conte de Sufforch en la marche de Picardie pardevant Lisle en pb 90 v (vol. 1)