pb 84 r (vol. 1)madame sa femme, et aussi de tous les barons qui la estoient, et fut grandement festiéz et honnouréz, quant on sçot pourquoy il estoit la venu.

¶ Dont premierement il remonstra au roy anglois, a messire Robert d’Artois et a tout le conseil, et comment il il s’estoit mis en possession de la duchié de Bretaigne, qui escheue lui estoit par la succession du duc son frere. Or faisoit il doubte que messire Charles de Blois ne lui empeschast, et aussi que le roy de France ne lui voulsist oster par sa puissance, pour quoy il estoit la trait pour relever et pour retenir en foy et en hommaige la ditte duchié du roy d’Angleterre a tousjours mais, et il l’en fist seur contre le roy de France et contre tous aultres qui empeschier le vouldroient.

¶ Quant le roy anglois entendi ces parolles, il y entendi voulentiers, car il vit bien que sa guerre encontre le roy de France en seroit embellie, et qu’il ne pouoit avoir plus belle entree ne plus prouffitable au royaulme de France que par Bretaigne, et que, tant qu’il avoit guerroié par les Allemans et Braibançons, il n’avoit riens fait fors que despendre et grossement. Et l’avoient mené et demené les seigneurs de l’Empire, qui avoient pris son or et son argent si comme ilz avoient voulu, sans riens faire. Si condescendi a la requeste du conte de Montfort lieement et prist l’ommaige de la ditte duchié de Bretaigne par la main du conte de Montfort, qui s’en appelloit duc. Et la lui ot le roy anglois en couvent, presens les barons et les chevaliers d’Angleterre et ceulx qu’il avoit amenéz de Bretaigne, qu’il l’aideroit et deffendroit contre tous hommes, feust roy de France, feust ou autre, selon son loyal pouoir. De ces hommaiges et promesses furent escriptes lettres et seellees, dont chacune partie ot la coppie. Oultre plus, le roy anglois et madame la royne donnerent au conte de Montfort et a ses gens grans dons et beaulx joyaulx, comme bien le savoit faire, et tant qu’ilz en furent grandement comptens, disans qu’il estoit un noble roy et vaillant et une noble royne, et qu’ilz estoient bien tailliéz de regner encore en grant prosperité.

¶ Aprés toutes ces choses faittes et accompliees, le conte de Montfort prist congié et se parti d’eulx et passa Angleterre et entra en mer en ce meismes port ou il estoit arrivé, et tant naga qu’il vint a Gredo en la Basse Bretaigne, et de la en la cité de Nantes, ou il trouva la contesse sa femme, a qui il recorda comment il avoit exploittié. Dont elle fut toute joyeuse et lui dist qu’il avoit tresbien exploittié et par bon conseil.

¶ Cy me tairay un petit d’eulx et parleray de monseigneur Charles de Blois, qui devoit avoir la duchié de Bretaigne depar sa femme, comme vous avéz ouy cy dessus determiner devant.