pb 63 v (vol. 1)nault en bon arroy avecques le conte. Premierement messire Jehan de Haynault, son oncle, le sire d’Anghien, le sire de Ligne, le sire de Barbançon, le sire de Leul, le sire de Haverech, chastellain de Mons, messire Guillaume Baillouel, le sire de Montigny, le sire de Barbais, messire Thierry de Walecourt mareschal de Haynault, le sire de Hame, le sire de Gomemes, le sire de Roissin, le sire de Transegnies, le sire de Brisuel, le sire de Labain, le sire de Mastin, le sire de Sars, le sire de Wargny, le sire de Beaurieu et plusoieurs autres chevalliers et escuiers, qui tous se logierent deléz leur seigneur.

¶ Asséz tost apréz y revint le jeune conte Guillaume de Namur moult estoffeement et se loga sur la riviere d’Escaut.

¶ Aprés y revindrent le duc de Braibant atout VIC lances, le duc de Guerles, le conte des Mons, le sire de Fauquemont, messire Ernol de Baquehen, et grant foison d’autres seigneurs et des gens d’armes d’Allemaingne et de Withephale. Si se logierent tous les uns aprés les aultres sur la riviere d’Escaut a l’encontre de l’ost françoise, et estoient plantureusement garnis de tous vivres et pourveances, qui tous les jours leur venoient de Vallenciennes et des autres villes de Haynault voisines a eulx.

Quant ces seigneurs se furent logiéz, comme vous avéz oy, sur Escaut et mis entre Naves et Ywis, le duc de Normandie, qui estoit d’aultre part la riviere, et avecques lui moult belles gens d’armes, vit que l’ost du conte de Haynaust croissoit durement. Si signiffia tout l’estat au roy de France son pere, qui lors se tenoit a Peronne a grans gens, et s’estoit ja tenu plus de six sepmainnes.

¶ Si fist derechief une semonce bien especiale et envoya jusques a XIIC lances a son filz de bonnes gens d’armes en son ost.

¶ Asséz tost aprés il y vint comme souldoyers, car il ne pouoit nullement venir a main armee sur l’Empire, s’il vouloit tenir son serement, ainsi comme il fist, pour quoy son filz fut tousjours chief de ceste besoingne, mais il s’ordonnoit par le conseil du roy son pere.

¶ Quant ceulx de Thun l’Evesque virent leur seigneur le conte de Haynault venir si puissantment, moult en furent resjouis, comme de raison estoit, car longuement l’avoient desiré.

¶ Le IIIIe jour aprés qu’ilz furent venuz, vindrent de Vallenciennes en grant arroy, desquelx Jehan de Vasy, qui prevost pour lors estoit, se faisoit maistre et gouverneur.

¶ Si trestost que ceulx de Valenciennes furent la venuz, on les envoya escarmouchier aux François sur la riviere de l’Escaut, pour essonnyer ceulx de l’ost et aussi pour faire voie a ceulx qui estoient ou chastel de Thun. La ot grant escarmouche des uns aux autres, et plusieurs carreaux trais et lanciéz, et maint homme navré et blecié. Endementres qu’ilz entendoient au paleter, les compaingnons de Thun l’Evesque, pb 64 r (vol. 1)