pb 53 r (vol. 1)sur un bon coursier, la targe ou col, le glaive ou poing et arméz de toutes pieces. Si esperonna tout devant de grant courage. Et quant messire Gilles de Mauny le vit venant vers luy, qui ne desiroit autre chose que la jouste, si en fut tout joyeux, et esperonna contre lui moult roidement, et se aconsuivirent de leus glaives sans espairgnier, moult merveilleusement. Si eschei si bien a Guillaume Marchant qu’il consi messire Gille de son glaive, si qu’il lui perça la targe et toutes ses armeures, si qu’il lui mist le fer dedens le corps tant qu’il le fist passer par l’autre léz, et l’abbatti jus de son cheval navréz a mort.
¶ De ceste jouste furent ces compaignons moult esbahis, et ceulx de Cambray moult resjouis.
¶ Lors se recueillirent ensemble. La ot, je vous dy, bien tresfort poingneis de premiere venue, et plusieurs des uns et des autres abatus par terre, et maintes appertires d’armes faittes.
¶ Finablement ceulx de Cambray obtindrent la place, et rebouterent leurs ennemis. Siques il en y ot plusieurs navréz et les chacierent bien avant. Et puis retindrent messire Gilles de Mauny, et ainsi navré qu’il estoit, et l’emporterent a Cambray a grant joye, et le firent tantost desarmer et regarder a la plaie et bien mettre a point. Et eussent voulentiers veu qu’il feust reschappé, mais il ne pot. Ainçois mourust dedens le segond jour aprés.
¶ Quant il fut mort ilz en orent conseil entre eulx. Siques ilz renvoierent le corps devers ses deux freres Jehan et Thierry, qui adoncques se tenoient en la garnison de Bouhain en Ostrevant. Car, quoy que le païs de Haynault ne feust point de guerre, si se tenoient les frontieres de France toutes closes et sur leurs gardes.
¶ Si ordonnerent adoncques un sarcuz asséz honnourablement, et le mistrent ens. Puis le recommanderent a deux freres meneurs et ainsi envoierent le corps a ses deux freres qui le receurent en grant douleur, et le firent ensevelir aux Cordelliers a Vallenciennes.
¶ Aprés s’en vindrent les deux freres de Mauny logier ou chastel de Thun l’Evesque, ou leur frere avoit esté mort, comme dit est, et firent a ceulx de Cambray moult forte guerre en contrevengant la mort de leur frere.
SHF 1-93 sync Comment ceulx de Cambray firent guerre au conte de Haynault par le consentement du roy de France. Et comment le conte de Haynault deffia le roy de France.Vous devéz savoir que pour le temps estoit messire Godemart du Fay, pour le roy Phelippe de France, tout cappitaine de la cité de Tournay, et de Tournesis et des forteresses environ. Et aussi lors estoit le sire de Beaugieu dedens Mortaigne sur l’Escaut, le seneschal de Carcassonne en la ville de Saint Amant, messire Aymery de Poitiers a Douay, messire le Galois de Baume, le seigneur de Villiers, le mareschal de Mirepois et le sire de Marueil en la cité de Cambray. Et ne desiroient tous pb 53 v (vol. 1)