pb 44 v (vol. 1)Et ja estoient la venuz le conte de Haynault et son oncle, le sire d’Angihen et le
sire de Faignuelles et pluseurs autres qui se tenoient deléz le conte leur seigneur et reçurent le roy anglois moult lieement. Le roy
prist le conte par la main et le mena jusques a la salle qui moult bien
estoit appareilliee pour le recevoir. Dont il advint que, en montant en la salle,
l’evesque de Lincolle qui la estoit leva sa voix et dist: "Guillaume d’Ausonne, evesque de Cambray, je vous admonneste comme procureur
du roy d’Angleterre, vicaire de l’empereur de Romme, que vous vvueilliéz ouvrir la cité de Cambray.Autrement vous vous
forfaittes et y entrerons a force." Dont nul ne respondi a ceste parolle, car l’evesque n’estoit pas la present.
¶ Encores parla l’evesque de Lincolle et dist: "Conte de Haynault, nous vous admonnestons depar l’empereur de Romme que vous veniéz servir le roy d’Angleterre son vicaire devant la cité de Cambray, a ce que vous y devéz de gens." Au quel le conte qui la estoit respondi: "Voulentiers."
¶ Aprés ces parolles ilz entrerent en la sale et menerent le roy anglois en sa chambre. Puis aprés fut le soupper appareillié qui moult fut beau et bien ordonné.
¶ A l’endemain se parti le roy d’illecques et s’en vint a Haspre et la reposa II jours en attendant ses gens qui venoient a grant foison, tant d’Angleterre comme d’Allemaigne.
SHF 1-76 syncQuant le roy d’Angleterre ot esté deux jours a Haspre et que ja ses gens furent moult passéz, il s’en party de la et s’en vint devers Cambray et se loga a Ywis et assega la cité de Cambray de tous poins et tousjours lui croissoient gens.
¶ Au VIe jour que le roy anglois et tous ces seigneurs se furent logiéz vint le duc de Braibant en l’ost moult estouffeement et avoit en sa compaignie bien IXC lances sans les autres armeures de fer dont il y avoit grant foison. Et se loga devers Ostrevant sur l’Escaut et la fist faire un pont pour aler de l’un des osts a l’autre. Aussi vint le jeune conte de Haynaut en tresgrant arroy et monseigneur Jehan de Haynault son oncle et se logerent asséz pres du roy.
¶ Si furent tous les autres seigneurs comme le duc de Guerles, le marquis de Juilliers, le marquis de Blanquebourch, le conte des Mons, le conte de Saunes, le sire de Fauquemont et briefment tous les autres qui grant foison estoient.
¶ Tantost que le duc de Braibant fut venu au siege de Cambray, il envoya deffier le roy de France qui se tenoit a Compingne. De quoy monseigneur Loÿs de Tranehen qui tousjours l’avoit excusé en fut si confus qu’il en mourut de dueil comme dit est.
¶ Ce siege durant devant Cambray ot plusieurs assaulx, escarmouches et paletis. Et chevauchoient par coustume messire Jehan de Haynault et le sire de Fauquemont ensemble dont ilz ardirent et foulerent durement le païs de Cambresis. Si vindrent un jour a toute leur route ou il avoit bien VC lances et mil autres combatants pb 45 r (vol. 1)