pb 42 r (vol. 1)sans delay a toutes leurs gens, ainsi que convenancié estoit, trois sepmaines aprés la saint Jehan pour aler devant Cambray que doit estre de l’Empire et estoit tourné devers le roy de France.
SHF 1-71 syncAinsi se departirent ces seigneurs, chascun rala en son païs et a son lieu. Et le roy Edouart, vicaire de l’Empire, s’en revint a Louvain deléz madame la royne sa femme qui nouvellement estoit la venue a grant compaignie et a grant noblesce de dames et de damoiselles d’Angleterre. Si tindrent a Louvain leur tinel moult honnourablement tout cest yver. Et fist faire monnoie d’or et d’argent a Anviers a grant foison. Mais pour ce ne laissa mie le duc de Braibant de renvoier soingneusement devers le roy de France messire Loys de Tranehen, son plus especial conseillier et chevallier, en lui excusant. En la fin il le fist demourer tout coy devers le roy et lui charga et enjoingny expressement que tousjours il l’excusast devers le roy et contredire toute accusacions qui pouoient venir au dit roy a l’encontre de lui. Le dit messire Loÿs n’osa contredire le commandement du duc son seigneur, ains en fist tousjours bien son devoir a son pouoir. Mais au derrenier il ot povre guerredon, car il mourut en France de dueil quant on vit apparentment le contraire de ce dont il excusoit le duc si certainement et en devint si confus qu il ne voult oncques puis retourner en Braibant. Si demoura tout coy en France pour soy oster de soupeçon tant qu’il vesqui. Ce ne fut pas longuement si comme vous orréz en avant recorder en l’istoire.
SHF 1-72 sync Comment le roy d’Angleterre fist requerir aux seigneurs de l’Empire qu’ilz lui tenissent leurs couvenances.Or passa cest yver, l’esté revint, la feste saint Jehan approucha. Ces seigneurs d’Allemaigne s’appareillierent pour achever leur emprinse. Le roy de France se pourvey a l’encontre, car il savoit partie de leur entente combien que il ne feust encores point deffiéz. Le roy anglois fist faire ses pourveances en Angleterre et ses gens d’armes appareillier et passer pardeça la mer.
¶ Sitost que la saint Jehan fut passee il s’en ala tenir lui mesmes a Villevort, et faisoit ses gens ainsi comme ilz appassoient oultre et qu’ilz venoient prendre hostelz en la ville de Villevort. Et quant la ville fut plaine, il les faisoit logier contreval les pres selon la riviere en tentes et en trefs. Et la se logerent et demourerent des la Magdelaine jusques a la Nostre Dame en septembre en attendant de sepmaine en sepmaine la venue des autres seigneurs et par especial du duc de Braibant, aprés qui tous les autres s’atendoient.
¶ Quant le roy anglois vit que ces seigneurs ne venoient point ne appareilléz estoient, il envoia certains messages vers chascun et les fist semondre, sur leur creant qu’ilz venissent sans aucun delay ainsi que creancé avoient ou ilz venissent le jour saint Gille pour parler a lui en la ville de Malignes et lui dire pourquoy ilz tardoient tant.
¶ Le roy Edouart sejournoit en la ville de Villevort a grans fraiz, ce puet pb 42 v (vol. 1)