pb 39 r (vol. 1)asséz esté festiéz et honnouréz il ot grant voulente de parler au duc de Braibant, au duc de Guerles son serourge, au marquis de Julliers, a monseigneur Jehan de Haynault, au seigneur de Fauquemont et a tous ceulx dont il esperoit estre conforté et qui estoient a lui encouvenanciéz pour avoir leur conseil comment et quant ilz pourroient commencier ce qu’ilz avoient entrepris. Ainsi le firent et vindrent tous a son commandement a Anviers entre la Penthecoste et la saint Jehan. Et la furent ilz festiéz grandement selon la maniere d’Angleterre. Aprés les mena le roy a conseil et leur demonstra moult humblement sa besoingne et voult savoir d’eulx la certaine entencion et leur pria qu’ilz s’en delivrassent. Car pour ce estoit il la venuz et avoit ses gens tous appareilliéz et lui tourneroit ce a grant dommaige se briefment ne s’en delivroient.
¶ Ces seigneurs orent grant conseil ensemble et long, car la chose les estraindoit, et si n’estoient point d’accord et tousjours regardoient sur le duc de Braibant qui ne faisoit point bonne chiere par semblant.
¶ Quant ilz furent bien conseilliéz et longuement, ilz respondirent au roy Edouart et distrent: "Chiers sire, quant nous venismes cy, nous y venismes plus pour vous veoir que pour autre chose. Si n’estions mie pourveus ne avisiéz de vous respondre sur ce que requis nous avéz Si nous retrairons vers noz gens, chascun vers les siens, et revendrons a vous a un certain jour quant il vous plaira, et vous responderons si souffisantment que la coulpe n’en demourra pas sur nous."
¶ Le roy vit bien qu’il n’en aroit aultre chose a ceste foiz, si s’en passa a tant. Et s’accorderent d’une journee a estre ensemble a trois sepmainnes aprés la saint Jehan. Mais bien leur demonstra le roy les grans fraiz et les grans dommaiges qu’il soustenoit pour leur atente, car il penssoit qu’ilz feussent tous pourveuz de lui respondre quant il vint la. Et leur dist qu’il ne s’en retourneroit jamaiz en Angleterre jusques ad ce qu’il sceust leur entencion plainement.
¶ Sur ce ces seigneurs se departirent et le roy demoura en l’abbaie de Saint Bernart jusques aprés la journee. Et demourerent avecques le roy pluseurs chevalliers d’Angleterre pour lui faire compaignie. Les autres aloient esbanoyant parmy le païs a grans fraiz, la ou ilz estoient bienvenuz et bien festiéz.
¶ Le duc de Braibant s’en ala a la Leuvre et la se tint un grant temps et souvent envoioit ses messages au roy de France pour lui excuser et prier qu’il ne voulsist croire nulle mauvaise informacion contre lui.
SHF 1-66 syncLe jour approucha et vint que le roy anglois attendoit la responce de ces seigneurs, mais ilz se firent souffisantment excuser au roy et lui manderent que ilz estoient appareillliéz, eulx et leurs gens, ainsi que convent estoit, mais qu’il feist tant au duc qu’il s’appareillast qui estoit le plus prouchain et cellui qui plus froidement se portoit, ce leur sembloit. pb 39 v (vol. 1)