pb 37 r (vol. 1)et la gardoient le passage contre les Anglois et faisoient guerre couvertement, dont les chevaliers d’Angleterre qui se tenoient en Haynault estoient tous informéz que s’ilz s’en raloient par la en leur païs, ilz seroient rencontréz, par quoy ilz n’estoient pas bien asseurs. Ce non obstant, ilz aloient et chevauchoient par le païs de Flandres es bonnes villes, mais c’estoit sur le confort de Jaquemart d’Artevelle que les portoit et honnouroit en toutes les manieres qu’il pouoit.
¶ Or retournerons un petit au duc de Braibant.
SHF 1-62 sync De l’excusation que le duc de Braibant fist pardevers le roy de France et la maniere comment.Quant le duc de Braibant ot faittes ses convenances que vous avéz ouyes aux Anglois, il s’avisa que le roy de France autrefoiz lui avoit esté contraire. Si se doubta qu’il ne se feust informéz durement encontre lui. Et que s’il avenoit que l’entreprise du roy d’Angleterre ne venist a bon port que le roy de France ne le voulsist guerroier et lui feist comparer ce que les autres avoient accordé. Si envoia de son conseil devers le roy de France messire Loÿs de Tranehen, sage chevalier durement, et pluseurs autres de son conseil pour lui excuser et dire au roy qu’il ne voulsist croire aucune mauvaise informacion contre lui. Car moult enviz il feroit nulle aliance ne convenance contre lui. Mais le roy d’Angleterre estoit son cousin germain, si ne lui pouoit bonnement escondire son païs, ne a lui ne a ses gens, leurs frais paians. Mais desormais il ne feroit plus riens qui deust estre au desplaisir du roy. Le roy le crut a celle fois et s’en appaisa a tant, mais touteffois le duc ne laissa mie pour ce qu’il ne retenist des gens d’armes en Braibant et ailleur, partout ou il les pouoit avoir, jusques a la somme que convenancié l’avoit au roy d’Angleterre. Et quant les dessus diz seigneurs orent fait en partie ce pour quoy ilz avoient passee la mer, ilz se partirent de Valenciennes ou ilz tenoient leur souverain sejour, premierement l’evesque de Lincolle, messire Regnault de Gobehen et tous les autres. Et tant firent qu’ilz vindrent a Dourdrech en Hollande et la monterent en mer pour eschiver le passage de Gagant ou les dessus diz chevaliers de Flandres se tenoient en garnison depar le roy de France et le conte de Flandres comme on disoit. Et s’en revindrent au mieulx qu’ilz pourent, et au plus couvertement, arriere devers le roy anglois qui les receut a grant joye. Et lui recorderent l’estat des seigneurs de pardeça, et premierement du duc de Braibant, du duc de Guerles, du conte de Juilliers, de l’arcevesque de Couloigne, de monseigneur Jehan de Haynault, du seigneur de pb 37 v (vol. 1)