pb 20 r (vol. 1)ou pris a grant meschief. Si se logierent la endroit
contre eulx et demourerent VIII jours tous plains sur celle segonde riviere montaigne, et tous les jours
rengiéz contre eulx. Si envoierent les seigneurs d’Angleterre bien
souvent leurs heraulx pardevers eulx parlementer que ilz voulsissent livrer place ou piece de terre ou on leur livreroit. Mais oncques a nul de ces traittiéz ne se
vouldrent accorder. Si vous dy en verité que l’un ost et l’autre en ces jours orent moult de mesaises.
La premiere nuit que les Anglois furent logiéz sur celle segonde montaigne a l’encontre des Escos, messire Guillaume de Douglas qui estoit moult preux et entreprennant et hardy chevallier prist entour mienuit environ IIC armeures de fer et passa celle riviere bien loing de leur ost, par quoy on ne s’en apparceust. Si fery en l’ost des Anglois moult vassaulment en escriant "Douglas! Douglas! Vous y morréz tous, seigneurs, barons anglois", et en tua lui et sa compaignie ains qu’ilz cessassent plus de IIIC. Et fery des esperons jusques proprement devant la tente du roy, tousjours criant et huant "Douglas! Douglas!" Et couppa II ou III cordes de la tente du roy, puis se parti a tant. Bien puet estre qu’il perdi aucunes de ses gens a se retraire, mais ce ne fut mie grantment. Et retourna arriere devers ses ses compaignons en la montaigne. Depuis n’y ot riens fait, maiz toutes les nuis les Anglois faisoient grans guets et fors, qu’ilz se doubtoient du resveillier des Escos et avoient mis gardes et escoutes en certains lieux, par quoy se ceulx sentissent ne ouyssent rien, ilz le segnifiassent a l’ost. Et gisoient presque tous les seigneurs en leurs armeures et tous les jours y avoit des escarmouches, et escarmouchoit qui escarmouchier vouloit. Si en y avoit souvent de mors et de pris, de navréz et de bleciéz et de mesaisiéz des uns et des autres.
SHF 1-37 sync Comment les Escos s’enfouirent par nuyt et des Anglois qui s’en retournerent en Angleterre et du mariage du roy d’Angleterre a la fille du conte de Haynault.Le derrenier jour des XXII fut pris un chevallier d’Escoce a l’escarmouche qui moult envis vouloit dire aux seigneurs d’Angleterre le convenant des leurs. Si fut tant enquis, enquis et examiné qu’il dist que leurs souverains avoient entre eulx accordé le matin que chascun feust armé au vespres et que chascun suivist la banniere messire Guillaume de Douglas quelque part qu’il voulsist aler et que chascun le tenist en secret. Mais le chevallier ne savoit de certain qu’ilz avoient enpenssé.
¶ Sur ce orent les seigneurs d’Angleterre conseil ensemble et aviserent que selon ces parolles les Escos pourroient bien venir par nuit brisier et assaillir leur ost a deux costéz, pour eulx mettre a l’adventure de vivre pb 20 v (vol. 1)