pb 16 r (vol. 1)sus une petite riviere pour eulx aisier et pour attendre le charroy et les pourveances. Et tout le jour avoient ars les Escos a V lieues pres de leur ost et ne les pouoient aconsuivir. L’endemain au point du jour chascun fut arméz et se trairent les banieres aux champs, chascun a sa bataille et dessoubz sa banniere, si comme ordonné estoit.

¶ Si chevauchierent les batailles ainsi rengees tout le jour sans desrouter, par montaignes, par valees, ne onques ne porent approchier les Escos qui ardoient tout devant eulx, tant y avoit de lacs, de maréz et de desers sauvages et mailaisees montaignes et valees. Et si n’estoit sur la teste a coupper, qui osast sorpasser ne chevauchier devant les banieres excepté les mareschaulx.

Quant ce vint aprés nonne sur le vespre, et gens, chevaulx, charroy et mesmement gens a pié estoient si travailliéz qu’ilz ne pouoient mais aler avant et les seigneurs s’apparceurent et virent clerement qui ilz se traveillloient en ceste maniere pour neant, et feust encores ainsi que les Escos les voulsissent si se mettoient ilz bien sur tel avantage, sur tel montaigne ou sur tel païs qu’ilz ne se pourroient a eulx combatre sans trop grant meschief.

¶ Si fut commandé depar le roy et depar les mareschaulx que on se logast la endroit, chascun ainsi qu’il estoit, jusques a l’endemain pour avoir conseil comment on se maintendroit.

¶Ainsi fut l’ost logiéz toute nuit en un bois sur une petite riviere, et le roy fut logié en une povre court d’abbaie qui la estoit. Ses gens d’armes, uns et autres et charroy et l’ost ensuivant furent logiéz moult loing, traveilliéz oultre mesure.

¶ Quant chascuns ot pris piece de terre pour soy logier, les seigneurs se trairent ensemble pour avoir conseil comment ilz se pourroient combatre aux Escoz selon le païs ou ilz estoient. Et leur sembla selon ce qu’ilz veoient, que les Escos s’en raloient leur voie en leur païs et que nullement ilz ne pourroient combatre a eulx entre ces montaignes fors que a grant meschief. Et si ne les pouoient aconsuivir, mais passer leur convenoit celle riviere de Thin. Et fut la dit en grant conseil que se on se vouloit lever devant mienuit et l’endemain un petit haster, on leur touldroit le passage de la riviere, et couvendroit qu’ilz se combatissent a leur meschief ou ilz demourroient tout coy en Angleterre pris et la attrapéz.

A celle entente que dit vous ay fut adont ordonné et accordé que chascun se traist a sa loge pour souper et pour boire ce qu’il pourroit avoir. Et deist chascun a ses compaignons que sitost que on orroit la trompette tromper chascun meist ses selles et appareillast ses chevaulx. Et quant on orroit la segonde foiz que chascun s’armast et a la tierce foiz que chascun montast sans targier et se traist pb 16 v (vol. 1)